Her çend di 30'yê Çileyê de di navbera Hêzên Sûriyeya Demokratîk (HSD) û Hikûmeta Demkî ya Şamê de agirbest hatine îmzekirin jî, hîn ne diyar e ku Şam dê çi gavên pratîkî bavêje. Çalakiyên ku li dijî êriş û gefên li ser Bakur û Rojhilatê Sûriyeyê hatine destpêkirin, berdewam dikin.

 

Di vê çarçoveyê de, di 14'ê Sibatê de li gelek bajarên Ewropayê, bi taybetî li Strasbourg a Fransayê, meşên mezin dê bi dirûşmeya "Azadî ji bo Rêber Ocalan, Statu ji bo Rojavayê" werin lidarxistin. Meş dê ji aliyê Tevgera Jinên Kurd a Ewropayê (TJK-E) û Kongreya Civaka Demokratîk a Kurd a Ewropayê (KCDK-E) ve werin birêvebirin.

 

Meş dê hem êrişên li ser Bakur û Rojhilatê Sûriyeyê protesto bikin û hem jî salvegera komploya 15'ê Sibatê ya li dijî Rêberê Gelê Kurd Abdullah Ocalan şermezar bikin.

 

Hevserokê KCDK-E'yê Engîn Sever destnîşan kir ku banga "seferberiyê" ya Rêveberiya Xweser a Bakur û Rojhilatê Sûriyeyê li Ewropayê bûye cihê bersiveke xurt û got: "Bi hezaran çalakiyên protestoyî hatin organîzekirin. Bi mîlyonan Kurd, digel hevabendên xwe, li kolanan bûn. Ev bertek heta roja îro jî kêm nebûye."

 

'ÊRIŞ LI DIJÎ DESTKEFTIYAN BÛN'

 

Sever diyar kir ku êriş li dijî destkeftiyên hemû Kurdan hatiye kirin û wê şiband "komployeke navneteweyî". Sever wiha domand: "Ev komplo, ne li ser Rojavayê bû. Armanca wê ew bû ku di serdema ku hêzên hegemonîk sînoran ji nû ve xêz dikirin de avaniyek bê Kurd biafirîne. Çawa ku li Lozanê rastiyeke Kurd hat paşguhkirin, wan dixwest di vê sedsalê de pergalekê ava bikin ku Kurdan qebûl neke. Eşkere ye ku ger niha berxwedan bişikê, hedef dê Başûrê Kurdistanê be. Ji ber vê yekê, gelê Kurd bi ruhekî seferberiyê beşdarî van çalakî û bûyeran bû. Ev çalakî û bûyer hîn jî berdewam dikin. Armanc ew e ku pergalek were avakirin ku tê de statuya Rojavayê were naskirin. Ev çalakî, dê heta ku Rojava statuya xwe bi dest bixe, berdewam bikin."

 

MEŞÊN 14'Ê SIBATÊ

 

Sever anî ziman ku li gelek navendan plansaziyên çalakiyan hene û got: "Me dosya amade kirine da ku raya giştî û siyaseta cîhanê li ser sûcên şer ên hatine kirin agahdar bikin. Bi xurtkirina tora têkoşînê ya li qadê, em ê di serdema pêş de çalakiyên xwe bi girseyî bidomînin. Em ê di her warî de tiştê ku Kurd dixwazin û tiştê ku HTŞ li Sûriyeyê xizmetê dike îfade bikin. Em dibînin ku komploya navneteweyî li Sûriyeyê xwe dubare dike. Di vê çarçoveyê de, em ê di 14'ê Sibatê de li seranserê Ewropayê çalakiyên berfireh pêk bînin. Navenda çalakiyan dê Strasbourg be. Dirûşmeya çalakiyên me dê 'Azadî ji Rêber Ocalan re, Statu ji Rojava re' be."

 

Sever wiha destnîşan kir: "Ne tenê Kurd beşdarî van çalakiyan dibin. Kesên ku li dora Şoreşa Rojavayê û yên ku li dora paradîgmaya demokratîk, ekolojîk û rizgariya jinan a Rêber Apo bûne yek jî beşdar dibin. Dostên Kurdan jî dê van çalakiyan bi rê ve bibin. Di vê çarçoveyê de, em ketine serdemeke girîng a çalakiyan û em ê wê bidomînin."

 

MA / Omer Îbrahîmoglû