Îfadeya Ahmet Ozer: Îradeya gel tê xespkirin 

2024-10-31 09:27:21


	 

	NAVENDA NÛÇEYAN - Şaredarê Esenyurtê Ahmet Ozer ku hate girtin di îfadeya xwe de got ku îktîdar hewl dide îradeya gel xesp bike û bi îdiayên derheqê wî de re bingeha qeyûm amade bikin. 

	 

	Şaredarê Esenyurt a Stenbolê Ahme Ozer duh bi îdiaya “endamtiya rêxistinê” hate girtin. Îfadeya Ozer a li dozgeriyê derket holê.  Ozer, sûcdariyên li wî tên kirin red kir, got ku di gelek saziyên cemaweriyê de xebitî ye û heta niha derheqê wî de tu lêpirsîn an jî teqîbat tune ne. 

	 

	Ozer, got ku ji her du kesan dengê kesekî girtiye û ev tişt anî ziman: “Bû 7 meh in şaredartiyeke serkeftî dikim. Hewldaneke siyasî tê kirin û îradeya gel tê xespkirin. Ev yek nayê qebûlkirin. Hewl didin pergala li Stenbolê xera bikin û di nava mirovan de înfîalê derxînin. Dê encamên vê yên ji hêla şaredarvanî û siyasî ve hebin. Weke ku ji dosyayê jî tê fêmkirin tu bingeheke van îdiayan tune ye. Weke mînak, min heta niha derdora 40 pirtûkan nivîsandiye. Beşek ji van têkildarî pêşxistinê û beşekê wê jî têkildarî meseleya kurd e. Derdora 200 gotarên neteweyî û nêzî 300 danezan min weşandine. Gelek televîzyonên neteweyî yên Tirkiyeyê serî li min dane. Di rewşeke wiha de tê îdiakirin ku di hevdîtina sala 2002’yan a bi Abdullah Ocalan re de navê min bêyî îradeya min derbas bûye û têm sûcdarkirin. Ez nivîskar im, her kes dikare bixwîne. Derbasbûna navê min a di wir de gelo ma dibe delîl? An jî dema navê kesekê din tê gotin ev dibe sûc?” 

	 

	'BINGEHGA QEYÛM HATIYE AVAKIRIN’ 

	 

	Ozer, got ku tu eleqeya wî bi tu rêxistinan nîne û wiha domand: “Ev yek nîşan dide ku ev dozeke siyasî ye. Tê gotin ku ne Mehmet Kaya lê xizmên wî endamên rêxistina terorê ne. Ez nas nakim. Dayika wî miriye û min jê re gotiye; ‘Serê we sax be, dayikeke we ya binirx heye.’ Qaşo ev tê çi wateyê? Ev gotin nayên bîra min lê heke min gotibe jî çi tiştê vê dibe sûc? Ev tevek gotinên çêker in, ji bo bi atraksiyonên siyasî ji peywirê bêm girtin hatine çêkirin. Bingeha tayînkirina qeyûm hatiye avakirin. Hêj ez li dozgeriyê bûm ku A Haberê û hwd. gotin ku qeyûm hate tayînkirin.”

	 

	'REMZÎ KARTAL PARLAMENTER BÛ’

	 

	Ozer, ji bo pirsa têkildarî Faîk Kaplan jî wiha got: “Ez kesê bi navê Faîk Kaplan nas nakim. Min ew mal dabû kirê. Bi qasî ji keça xwe hîn bûme, kesê mal jê re hatiye kirêkirin xizmê van e. Heke were lêkolînkirin dê were dîtin ku her meh pereyê xwe şandiye. Ez nizanim ev kes kî ye, bi rêya keça min a parêzer her meh bi rêya emlaqfiroşan kirêya xwe şandiye û nizanim çavkaniya wê çi ye.” 

	 

	Têkildarî pirsa derheqê Hevserokê KONGRA-GEL Remzî Kartal jî Ozer ev tişt anî ziman: “Remzî Kartal jî ji Wanê ye. Parlamenterê Wanê bû. Em ji heman eşîrê ne. Piştî derketî derveyî welat têkiliya min pê re qut bû. Îdeolojî û fikrên me ne wekî hev in û malbata wî nas dikim. Li Wanê ne. Dema çûm Wanê min sersaxî jê re xwest. Hindik maye ji vê jî encamekê derxînin. Ev tişt tiştên însanî ku dikim.” 

	 

	'KONSER ME Û QEYMEQAMTIYÊ BI HEV RE LI DAR XIST’ 

	 

	Ozer, ji ber konsereke li Esenyurtê jî hate tawanbarkirin. Ozer, têkildarî konserê wiha got: “Me konsereke li dar xistiye. Me ev konser tevî Qeymeqamê Esenyurtê Fatîh Çobanoglû li dar xist. Me bi hev re organîze kir. Konsera ewil tevî qeymeqam, hevjîna wî û 46 komeleyan hate kirin. Bi dehan hunermend hatin gazîkirin. Min di jiyana xwe de tenê yek carê jî Rojda nedîtiye. Min tenê li wir li ser dikê dît. Li cihên cuda stranan dibêje. Bi dehan kes hatine vexwendin lê min nevexwendiye. Memûrên li wir bi vê mijarê re eleqedar bûn. Dê kî were dê kengî were ew diyar dikin. 450 hezar kes hatine mîhrîcanê. Tê gotin ku 3-5 kesên li wir têkildarî Ocalan dirûşm berz kirine. Heke tiştekî wiha hebe bila emniyetê binçav bikira. Min nedît, nebihîst. Heke min bidîta dê mudaxile bikira. 70 - 80 hezar kes li wir in ma ez ê çawa bibînim kê dirûşm berz kiriye?” 

	 

	'HÊMAYÊN SÛC NEHATIN DÎTIN’ 

	 

	Ozer, diyar kir ku dozeke siyasî ye û wiha got: “Ez tevahiya îdiayên tên kirin red dikim.  Di salên 2016 û 2017’an de min ji Dozgeriya Komarê ya Mêrsînê belgeyek girt. Ez hatime guhdarîkirin, dozger bangî min kir. Di wê guhdarîkirinê de tiştek nehatiye tespîtkirin. Got ku ev yek bi awayekî derusûlî hatiye kirin û heke bixwazim dikarim serlêdana sûc bikim. Min jî got ku heke hewce bike dê serlêdana sûc bikim. Dema berê li min hatî guhdarîkirin, tu hêmayên sûc nehatin dîtin, navnîşana min diyar e û gumana rev û xweveşartinê tune ye. Piraniya delîlan hatin komkirin û îxtîmala ku bandorê li delîlan bikim tune ye. Ji ewil dixwazim bêm berdan û heta dadgeriya we digihije qenaeteke din dixwazim bi şertê kontrola edlî bêm berdan.”