
Rêxistinên Elewiyan li Dêrsimê bang kirin: Em qeyûmê xespkar qebûl nakin 

2024-11-25 16:29:31


	DÊRSIM - Rêxistinên Elewiyan ên li dijî qeyûm çûne Dêrsimê wiha gotin: “Bi qasî misqalê jî rewatiya qeyûman ji bo gelê Dêrsimê nîne. Armanca vî qeyûmî talankirina van deran e. Em ê destûr nedin.”&nbsp;

	Çalakiyên nobetê yên li dijî tayînkirina qeyûm a li Şaredariya Dêrsimê berdewam in. Girseya ku li Sûka Binerdî ya li navendê kom bû, heta pêşiya şaredariya qeyûm lê hatiye tayînkirin meşiya. Hevberdevkê HDK’ê Alî Kenanoglû, Serokwekîla Koma DEM Partiyê Gulistan Kiliç Koçyîgît, Hevberdevka Komîsyona Gel û Baweriyan a DEM Partiyê Yuksel Mutlu, Hevseroka Giştî ya DAD’ê Kadriye Dogan, Serokê Giştî yê PSAKD’ê Cûma Erçe, Seroka Giştî ya Komeleya Elewiyan a Çandê Seher Şengullu, Serokê Giştî yê Federasyona Elewiyan a Tirkiyeyê Zeynel Abîdîn Koç û Serokê Giştî yê Federasyona Elewî Bektaşî Mûstafa Aslan tev li bûn.&nbsp;

	&nbsp;

	‘DIJMINATIYA BAWERIYEKÊ DIKIN’

	&nbsp;

	Hevberdevkê HDK’ê Alî Kenanoglû di axaftina xwe de got ku çavkaniyên sererd û binerd ên Dêrsimê her tim rastî êrişan tên û wiha got: “Di esasê xwe de qeyûm ne tenê guherîna şaredariyê yan jJî xespkirina kursiyê ye. Talankirina erdnîgariyekê, tunekirina çanda wê ye. Ev qeyûm di heman demê de dijminatiya gel, xweza û baweriyê dikin. Tevî hêzên demokrasiyê dê têkoşîna me ya li dijî qeyûman bidome. Tevî zext û zilma we jî ev gel îradeya we qebûl nake. We nas nake.”&nbsp;

	&nbsp;

	‘FERASETA QEYÛMPEREST YEKPEREST E’

	&nbsp;

	Cûma Erçe jî destnîşan kir ku tayînkirina qeyûman di heman demê de hedefgirtina saziyên baweriyê ye. Erçe, bi lêv kir ku weke nûnerên bi milyonan elewiyan ew ji bo piştevaniyê hatine Dêrsimê û ev tişt anî ziman: “Yên dixwazin elewîtiyê tune bikin û li dijî baweriya me şer bikin, dema dîtin piştgiriyê nagirin ev gav avêtin. Lewma jî ev zîhniyeteke qeyûmperest, yekperest, înkarger û asîmîlasyonker e.”&nbsp;

	&nbsp;

	Mûstafa Aslan jî da zanîn ku dê li dijî qeyûman piştevaniya xwe ya bi gelê Dêrsimê re bidomînin. Seher Kultur jî got ku ew neviyên kesên bi hezaran sala ye li ber xwe didin in û ew ê xaka Dêrsimê ji zîhniyeta talanker re nehêlin. Nûnerê SMF’ê Mahîr Guruz, hunermend Erdogan Emîr jî bertek nîşanî tayînkirina qeyûm dan û gotin: “Qeyûm talan e û em ê li dijî vê talanê bisekinin û li cem xelkê Dêrsimê bin.”&nbsp;

	&nbsp;

	Piştî daxuyaniyê li pêşiya şaredariya Dêrsimê çalakiya rûniştinê hat lidarxistin.&nbsp;