Beştaş: Hûn nikarin Pirsûs û Rihayê ji hev veqetînin  Hatîmogûllari: DAIŞ, HTŞ û SMO ji hêla heman çavkaniyê ve tê xweyîkirin

2024-12-04 16:31:54


	RIHA - Hevberdevka HDK’ê Meral Daniş Beştaş diyar kir ku ew ê li dijî êrişên ser Bakur û Rojhilatê Sûriyeyê bêdeng nemînin. Hevseroka Giştî ya DEM Partiyê Tulay Hatîmogûllari jî got ku DAIŞ, HTŞ û SMO ji heman çavkaniyê tên xweyîkirin û tevek jî komên paramîlîter in. 

	Êrişên li dijî Bakur û Rojhilatê Sûriyeyê li navçeya Pirsûsê ya Rihayê ya li ser sînorê Kobanê hatin protestokirin. Hevseroka Giştî ya DEM Partiyê Tulay Hatîmogûllari di çalakiyê de wiha got: “Heta ku li herêmê pergaleke aştî, aramî û xwişk-biratiyan gelan pêk tîne tê avakirin dê têkoşîna me bidome. Me ev fîlm beriya niha jî dîtibû. Di sala 2011’an bi destpêkirina şerê Sûriyeyê re hêzên mîna DAIŞ’ê berdan qadê. Rêxistinên berhemên DAIŞ’ê niha bi navê HTŞ’ê rabûne. An ku navê wan bûye Artêşa Neteweyî ya Sûriyeyê. Tevek jî ji hêla heman çavkaniyê ve tên xweyîkirin.” 

	 

	Tulay Hatîmogûllari, wiha domand: “Me got ku divê Tirkiye siyaseta aştî, dîplomasî û guftûgoyê bimeşîne. Me got heke hûn baweriya xwe bidin van çeteyên nirxên îslamê ji bo berjewendiyên xwe bi kar tînin, dê roj were li we jî vegerin. Jixwe ji Tirkiyeyê heta Amerîka û Ewropayê, komkujiyên DAIŞ’ê kirin li holê ne. Me komkujiyên Pirsûs, Gara Enqereyê û daweta Dîlokê ji bîr nekirine. Vaye van çeteyên we ava kirin li Tirkiyeyê xistin. Îktîdarê ev bi zanebûn û dilxwazî kir. Ji bo temenê xwe dirêj bike rê da Komkujiya Gara Enqereyê.” 

	 

	'LÎSTIKÊN WE LI TIRKIYEYÊ VEDIGERIN’ 

	 

	Tulay Hatîmogûllari, wiha dirêjî da axaftina xwe: “Divê li Sûriyeyê aştî çêbibe. Ev komên paramîlîter rewşa aştiyê jehrî dikin. Her lîstika hûn li Sûriyeyê dilîzin li Tirkiyeyê vedigerin. Ji ber ku we nexwest pirsgirêka kurd bi rêyên aştiyane û demokratîk çareser bikin, niha li herêmê hûn xwedî gotin nînin. Tu bangên we yên ji bo aştiyê jî tu bandora wê nîne. Tirkiyeya ku pirsgirêka kurd bi rêyên aştiyane û demokratîk çareser kirî, dê bêhtir jixwe bawer be. Her wiha divê ji bo fermîbûna statûya Rojava hewl bide. Divê ji bo destûreke bingehîn a nû ya demokratîk a li Sûriyeyê bixebite. Ji bo vê jî divê tavilê li hevdîtinên Astanayê vegere. Yek ji xala wê ya girîng jî bêçekkirina van komên çete yên li Idlibê bû. Lê berevajî wê kirin û bêhtir çek dan wan. Lewma bûn sedema şerekî nû. 

	 

	Tu feydê vê rewşê dê ji bo gelên Tirkiyeyê û herêmê nebe. Di vê aloziyê de tişta herî girîng, aştiya Tirk-Kurd-Ereban e. Divê Tirkiye ji bo vê bixebite. Lê berevajî vê dike. Dê têkoşîna me bidome.” 

	 

	BEŞTAŞ: DÊ KURD LI BER XWE BIDIN

	 

	Hevberdevka HDK’ê Meral Daniş Beştaş jî êriş şermezar kir û ev tişt anî ziman: “Di demên berê de kurdan û dostên wan rê li ber êrişên DAIŞ’ê girtin. Em ê van êrişan jî bidin sekinandin. Em ê li dijî wan çeteyên dijminê mirovahiyê bi hev re li ber xwe bidin. Di vê mijarê de em ji hêza xwe bibawerin. Rojhilata Navîn veguheriye goga agir û gefa qirkirinê li ser gelan heye. Rojava ji bo pêşeroja xwe li ber xwe da û Tirkiye jî dijminatiya wê dike. Bloqa îktîdarê çekên xwe yên 10 sal berê hêj nekişandine û dev ji xwarina gefan berneda. 

	 

	Dibêjin ‘Kurd birayên me ne û pirsgirêka me bi wan re tune ye.’ Hûn kurdên li Kobanê û Pirsûsê çawa ji hev qut bikin? Hûn dê li wir piştgiriyê bidin çeteyan lê li vir aştiyê bikin? Dema xwişk-birayên me li wir di bin gefa qirkirinê de, em li vir wisa bêdeng nabin. Dinyayeke wisa tune ye. Bêguman bi milyonan kurdên li Bakur dê bi xwişk-birayên xwe re li ber xwe bidin. Rêya aştiyê ew e ku hûn çekên xwe paşve bikişînin. Divê hûn kurdan qebûl bikin. We nekarî Pirsûs û Kobanê ji hev veqetînin û dê nekarin. Hûn nikari gelê kurd ji hev veqetînin.”