
Waniyan bertek nîşanî biryara Dadgeha Bilind dan: Em vê neheqiyê qebûl nakin 

2024-12-05 11:08:51


	WAN - Xelkê Wanê bertek nîşanî biryara Dadgeha Bilind a têkildarî mafên memnu yên Hevşaredarê Bajarê Mezin ê Wanê Abdullah Zeydan dan û gotin ku dê vê biryarê û neheqiyê qebûl nekin.&nbsp;

	3’yemîn Daîreya Cezayan a Dadgeha Bilind têkildarî biryara derheqê îadekirina mafên memnu yên Hevşaredarê Bajarê Mezin ê Wanê Abdullah Zeydan biryar da û bi îdiaya “bêusûliyê” betal kir. Dosya, ji 5’emîn Dadgeha Cezayên Giran a Amedê re hate şandin û dê bê lêkolînkirin. Xelkê Wanê têkildarî biryarê axivî û bertek nîşan da.&nbsp;

	&nbsp;

	'QEYÛM ŞÊLANDIN E’

	&nbsp;

	Îskender Yurt, diyar kir ku biryara Dadgeha Bilind dibe ku weke hinceta tayînkirina qeyûm were nîşandan û wiha got: “Em ê rê nedin vê rewşê. Em qeyûman naxwazin. Ma hevşaredarên me çi kiribûn ku ji peywirê girtin? Ya ku tê kirin zodestî ye. Em xwedî li îradeya xwe derketin û bi ser ketin. Me mîna wan dizî nekir. Me deynên qeyûm dît. Careke din jî ji bo Wanê heman tişt kirin lê me bi berxwedana xwe rê neda. Hewce bike em ê dîsa heta dawiyê li ber xwe bidin.”&nbsp;

	&nbsp;

	Mehmet Başaran jî got; “Îktîdar neheqiyê li kurdan dike. AKP’ê bêyî hîleyan yek tiştek bi dest nexistiye. Hemû çavkaniyên welêt xwar û tune kir. Aborî têk çû, bûdçeyê em dizanin ji ku re xerc dike. Tenduristî, aborî, perwerde, edalet, hiqûq, her tiştek tune kirin. Em qeyûman şermezar dikin û qebûl nakin. Qeyûm, şêlandin e, sûcê li dijî mirovahiyê ye. Xizmeta şaredariyên DEM Partiyê kirin wan ji destpêka komarê heta niha nekirine. Tehemûla wan a ji bo xizmetê tune ye. Êdî bes e.”

	&nbsp;

	‘KESEK VÊ NEHEQIYÊ QEBÛL NAKE’

	&nbsp;

	Resûl Koç jî got; “Min dengê xwe dabe kê bila ew min birêve bibe” û wiha pê de çû: “Bila kesên îktîdar ferz dike me birêve nebin. Ev heqarete li gelê kurd. Heke qeyûm tayînî Wanê bikin; em ê dîsa xwedî li vîna xwe derkevin. Ji roja ev partî hatiye avakirin heta niha ez têdikoşim û dê her têbikoşim.”&nbsp;

	&nbsp;

	Abdî Akkoyun jî got ku mafê bijartin û hilbijartinê yê gelê kurd hatiye xespkirin, ev yek weke heqaret nirxand û got ku heke qeyûm were tayînkirin ew ê li kolanan li ber xwe bidin û xwedî li îradeya xwe derkevin.&nbsp;

	&nbsp;

	BAL KIŞAND SER ‘BERXWEDANÊ’

	&nbsp;

	Kemal Aslan njî li dijî sepana qeyûman derket û got: “Em qeyûman qebûl nakin û nas nakin. Em êdî bêdeng namînin. Dê têkoşîna me ya li dijî neheqiyan bidome. Em bimrin jî dê paşvegavê neavêjin û têbikoşin. Dê heqê xwe bipaêzin.” &nbsp;Şemsettîn Şîpal jî got ku wî dengê xwe nedaye qeyûman lê daye DEM Partiyê û ev tişt anî ziman: “Ya ku tê kirin bêhiqûqtî û heqaret e. Dawî li polîtîkaya qeyûm bînin. Aştî û qeyûm bi hev re nabin. Divê dev ji van polîtîkayan berdin.”&nbsp;

	&nbsp;

	'EM Ê QEBÛL NEKIN’

	&nbsp;

	Husnu Gurkan jî bi lêv kir ku îktîdarê aramî, edalet û hiqûq ji holê rakiriye û wiha got: “Qala xwişk-biratiyê dikin lê bêhiqûqtiyê li kurdan dikin. Axaftina rastiyan qedexe ye. Li vî welatî ne heq ne jî hiqûq heye.” Adem Çelîk, jî got: “Wan dê mîna berê dîsa xwedî li îradeya xwe derkeve. Divê her kesên ji xwe re dibêjin muxalîf jî dengê xwe derxîne. Xespkirina îradeyê zilm e. Em ê li dijî vê xespê heta mirinê li ber xwe bidin.”&nbsp;

	&nbsp;

	Mûstafa Acar jî tiştên tên kirin weke neheqî nirxand û got ku gelê Wanê dê tayînkirina qeyûm qebûl neke û heta dawiyê li ber xwe bide.&nbsp;

	&nbsp;

	Du welatiyên nexwestin navên xwe bidin jî gotin ku îktîdar çi bike jî dê gelê kurd xwedî li îradeya xwe derkeve, dê li ber xwe bide.&nbsp;

	&nbsp;

	MA / Mazlum Engîndenîz - Ozlem Yacan

	&nbsp;