
Hevserokên DEM Partiyî: Divê Abdullah Ocalan were berdan 

2024-12-23 09:01:47


	EDENE - Hevserokên DEM Partiyê yên Edene, Mêrsîn û Antalyayayê xwestin ku Tirkiye biryara mafê hêviyê ya DMME’yê bi cih bîne û Rêberê PKK’ê Abdullah Ocalan berde. &nbsp;

	Hevserokên Partiya Wekhevî û Demokrasiyê ya Gelan (DEM Partî) yên bajarên Edene, Antalya û Mêrsînê xwestin tecrîda girankirî ya li ser Rêberê PKK’ê Abdullah Ocalan bi dawî bibe û ji bo çareseriya demokratîk a pirsgirêka Kurd gav bên avêtin. Hevserokê DEM Partiyê yê Edeneyê Seyfettîn Aydemî xwest ku dewleta tirk biryara Dadgeha Mafên Mirovan a Ewropayê (DMME) ya mafê hêviyê ya têkildarî Rêberê PKK’ê Abdullah Ocalan bicih bîne û wiha got: “Tecrîd, sûcê li dijî mirovahiyê ye.”&nbsp;

	&nbsp;

	Bi domdarî Aydemî, anî ziman ku tecrîda li ser Abdullah Ocalan ji hêla însanî, hiqûqî û makeqanûnî ve nayê qebûlkirin û wiha pê de çû: “Bi rastî jî pirsgirêkên girîng ên Tirkiyeyê hene. Lê astengiya herî mezin a li pêşiya çareserkirina van pirsgirêkan, pirsgirêka Kurd e. Heta pirsgirêka Kurd neyê çareserkirin ne demokrasî dê were ne jî dê aborî baş bibe. Ji ber ku ev 30 sal in bûdçeya vî welatî ji bo vî şerê qirêjî tê xerckirin. Lewma li gorî me divê ev pirsgirêk tavilê were çareserkirin.”&nbsp;

	&nbsp;

	'BILA OCALAN WERE BERDAN’&nbsp;

	&nbsp;

	Hevserokê DEM Partiyê yê Antalyayê Îhsan Nergîz jî diyar kir ku tecrîd ji Îmraliyê belavî hemû girtîgehan û civakê bûye û got: “Divê tecrîd tavilê were rakirin û birêz Ocalan bê berdan.”&nbsp;

	&nbsp;

	Hevseroka DEM Partiyê ya Mêrsînê Bedriye Kuş jî anî ziman ku tecrîd hêj didome û wiha pê de çû: “Hevdîtina dawî hêviya rakirina tecrîdê ava kir lê ev pêk nehat. Di bingeha pirsgirêkên welat de polîtîkaya tecrîdê heye. Divê biryarên DMME’yê tavilê bên cîbicîkirin û di serî de Abdullah Ocalan, hemû girtiyên siyasî bên berdan. Em bangî îktîdara AKP’ê dikin; hemû şoreşger, demokrat, çepgir, sosyalîst û hwd. ên welat dixwazin birêz Abdullah Ocalan were berdan û weke muxatab bê dîtin.”&nbsp;

	&nbsp;

	MA / Abdulkadîr Ayten-Hamdullah Yagiz Kesen

	&nbsp;