NAVENDA NÛÇEYAN - Nivîskarê rojnameya e-rojname Yaşar Eroglu, bi romana xwe ya "Çerxa Xedar" derket pêşberî xwinerê xwe. Eroglu bi vê romanê rastî û heqîqeta heyî radixe pêş çavan.
Romana "Çerxa Xedar" ku nivîskarê e-rojname Yaşar Eroglu nivîsî, çap bû. Roman ji 192 rûpelan pêk tê û nivîskar roman bi zaravayê Kurmancî yê Kurdî nivîsî ye. Nivîskar di romanê de bal dikişîne ser dilsozî û hevaltiya 2 zarokan. Roman bi dilsozî û hevaltiya du zarokan dest pê dike. Di dema zaroktiya xwe de pir ji hev hez dikin û tu car ji hev naqetin. Dema ciwaniya wan rêya wan ji hev diqete, her yek di rêya xwe de diçe. Yek li gund dimîne, bi demê re bi rika yê din dibe cerdevan. Ê mayî dixwîne, diçe tev refên şervanan dibe, dibe şervan. Pişt re tê girtin. Ji vê qonaxê bi şûnde dayika wî ya weke lehengeke esas derdikeve pêş. Roman bi vî awayî dewam dike. Dayik ji kurê xwe pir hez dike. Her tim kurê xwe dişopîne û li pey wî diçe. Li derve cerdevan malbatê rihet bernade û neçar dike ji gund bar bikin. Greva birçîbûnê û rojiya mirinê her dem li pêş girtiyan e. Kurê wê jî her dikeve bin vî barî. Hezkirina dayikê û rojiya mirinê dayikê û kurê wê tîne li hember hev. Kurê dayikê bi tercîheke xedar re rû bir û dimîne çi biryarê bide. Ev rewş dikeve qonaxeke hesas û dilgiran. Çerxa Xedar romaneke êş, keser, bêbextî û têkoşînê ye. Pareke romanê ya giran pirsgirêk û rewşa girtîgehan jî radixe ber çavên xwîneran. Nivîskar bi zimanekî zelal, balkêş û serkeftî ev mijarên sereke derpêş kirine ji bo xwînerên romanê.