AMED - Seta folklorê ya bi navê “Zargul” ku ji 3 pirtûkan pêk te ji Weşanên Wardozê derket. 

 

 

Weşanên Wardozê, di sala 2017’an da li Amedê hatiye avakirin û bala xwe daye ser folklora kurdan.  Weşanxaneya ku tenê pirtûkên bi kurdî çap dike, heta niha li ser folklorê çar set û bi giştî jî 30 pirtûk çap kirine. Her wiha weşanxaneyê 9 pirtûkên dîrok, ziman û wêjeyê jî çap kirine. Li weşanxaneyê gelek pirtûkên folklorîk û wêjeyî jî li ber çapê ne. Herî dawî jî weşanxaneyê seta folklorê ya bi navê “Zargul” ku ji pirtûkên “Dewrêşê Evdî” , “Lîstikên Gundê Tizyanê” û “Gotinên Pêşiyan ji Xorasanê” pêk tê, li folklora kurdî zêde kir. 

 

DERWÊŞÊ EVDÎ

 

Pirtûka “Dewrêşê Evdî” destaneke bi nav û deng a netewî ya kurdan e. Berhevkarên pirtûkê Ordîxanê Celîl û Celîlê Celîl in. Malbata Celîlan di sala 1985’an de berê xwe dide Efrînê, li wir ji deve Ehmedê Nasirê Şemê destanê qeyd dike. Pirtûk ji 137 rûpelan pêk tê. 

 

LÎSTIKÊN GUNDÊ TIZYANÊ

 

Di pirtûka “Lîstikên Gundê Tizyanê” de Mem Mukrîyanî ji biçûkan heta mezinan 76 lîstikên gundê xwe Tizyanê bi şêwra gelek kesan û bi rêgez û qayîde yek bi yek, xal bi xal nivîsîne. Ji bo gelek lîstikan wêne hatine xêzkirin. “Beqlê, Çingildas, Çirê, Devê gur, Hingulîsk, Kab, Malek tê tê, Qevzê, Xirak..” hin ji wan lîstikan in. 

 

GOTINÊN PÊŞIYAN JI XORESANÊ

 

Yek ji xebata vê setê jî pirtûka bi navê “Gotinên Pêşîyan Ji Xorasanê” ye. Berhevkara pirtûkê Gulê Şadkam e. Di vê pirtûkê da nêzî 2000 gotinên pêşîyan yên Xorasanê tevî wateyên xwe hatine dayîn. Gulê Şadkam, li Xorasanê dijî lêkolîner û folklorîst e, bi salan li nava gel geriyaye û gotinên pêşiyan kom kiriye. Pirtûk ji 174 rûpelan pêk tê. 

 

MA / Fahrettîn Kiliç