Suleyman Kaya ku li kuçe û kolanên Rihayê bi ereboka desta amûrên kevnar dikire û difiroşee, diyar kir ku 15 sal in ew vî karî dike. Di dest Kaya de amûrên 10 qirn berê hene. 

 

HER ROJ 20 KÎLOMETRE RÊ DIÇE

 

Kaya, bilêv kir ku ew her roj li taxên bajêr digere. Kaya, diyar kir ku her çend bi piyan zehmet be jî, lê dema ew digere kêfxweş dibe. Kaya, destnîşan kir ku her roj ew tevî ereboka xwe ya destan 20 kîlometre rê dimeşe û got: "Bi piranî amûrên kevnar ne li taxên luks, lê li taxên kevn ên Rihayê peyda dibin. li Çarşiya Sifiran dikanek alvêra amûrên kevnar dike, lê ji min pêvtir kes bi ereboka destan vî karî nake. Hema bêje li tevahiya herêmê kesek wisa tune ye. Lê ez pir jê qezenc nakim. Carina heye hefteyekê jî tiştekî nafiroşim. Amûrên kevnar ne ji bo pêdiviyê ji bo kêfê tên kirîn, yanî bala herkesî nakişîne. Dema mirovên ji tiştên kevnar hez dikin min dibînin çend perçeyan bi hev re dikirin. Jixwe çend perçe eşya bifiroşim, têra min a mehekê dike." 

 

Kaya, anî ziman ku di dest wî de her cure perçeyên kevnar hene û ji ber ku bi salan e vî karî dike ji amûrên kevnar pir fam dike. Kaya bilêv kir ku ew ji nexşên li ser amûrên kevnar ên sifir û tûncî fêm dike ku amûr aîdî kîjan civakê ne. Kaya got, di dest wî de gelek amûrên kevnar ên aîdî ermenî û suryaniyan hene. 

 

Kaya, diyar kir ku her çend karê wî zehmet be jî, lê jê hez dike û got: "Heqê nan wisa ne hêsan e. Min dikaribû karekî din jî bikirana, lê ji vî karî hez dikim. Carinan hin mirov qîmetê nadin amûrên kevnar dixwazin bi erzanî bikirin. Fiyetê ku ez dibêjim ji wan re biha tê. Lê qîmeta her tiştekî heye."