NAVENDA NÛÇEYAN - Kesên çekdar li Hatayê hewl dan êrişî nûçegihana TELE1’ê Hazal Guven û kameraman Umutcan Yîtûk ên rewşa mexdûrên erdhejê dikişandin bikin.
Yek ji bajarên herî zêde ji erdheja Mereşê bibandorbûyî jî Hatay e. Rojnamegerên ku ji bo kişandina hilweşîna bajar û mexdûrên erdhejê çûn herêmê, rastî êrişên komên çekdar ên di van rojên dawî de derketine tên. Dema nûçegihana TELE1’ê Hazal Guven û kameraman Umutcan Yîtûk li navçeya Defneyê nûçe çêdikirin, pêşiya wan ji hêla komeke çekdar ve hate girtin. Li ser vê yekê rojnamegeran agahî dan polîsan û alîkarî xwestin. Piştî agahiya rojnamegeran, koma çekdar ji herêmê reviya.
Rojnameger Guven, têkildarî mijarê li ser hesaba xwe ya medyaya civakî ev agahî parvfe kirin: “Hêj jî dest û lingên me dilerizin. Pêşî li me girtin. Çek derxistin. Heke hevalê min ê kameraman Umutcan tavilê paceyên wesayît negirta, dibûya ku tiştekî din bi serê me bihata. Hêj jî destên min dilerizin. Pirsgirêka ewlehiyê ya li herêmê di asteke cidî de ye. Pir cidî ye.”