NAVENDA NÛÇEYAN - Derheqê 16 jê girtî bi giştî 18 rojnamegerên di 16’ê hezîrana 2022’yan de hatin girtin bi îdiaya “endamtiya rêxistinê” doz hate vekirin. Di îdianameyê de weşandina bername û nûçeyên rojnamegeran di televîzyonên kurd de weke “têkiliya rêxistinî” hate nirxandin.
Di çarçoveya lêpirsîna Serdozgeriya Komarê ya Amedê de, polîsan di 8’e hezîrana 2022’yan de bi ser malan de girt û 20 jê rojnameger bi giştî 22 kes binçav kirin. Rojnameger, 8 rojan di bin çavan de hatin ragirtin û di 16’ê hezîranê de sewqî edliyeyê hatin kirin. Midûra Karên Nivîsan a JINNEWS’ê Safiye Alagaş, Hevserokê Komeleya Rojnamegeran a Dîcle Firatê (DFG) Serdar Altan, edîtorê Ajansa Mezopotamyayê (MA) Azîz Oruç, Midûrê Karên Nivîsan ê Rojnameya Xwebûnê Mehmet Alî Ertaş û Zeynel Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Doguhan, Remziye Temel, Ramazan Gecîken, Lezgîn Akdenîz û Mehmet Şahîn bi îdiaya “Endamtiya rêxistinê” hatin girtin.
Rojnameger Gulşen Koçuk, Esmer Tunç, Mehmet Yalçin û Kadîr Bayram û Feynaz Koçuk û Îhsan Ergulen jî bi şertê kontrola edlî hatin berdan.
ÎDIANAME 10 MEH PIŞTRE HATE AMADEKIRIN
Serdozgeriya Komarê ya Amedê têkildarî rojnamegerên girtî Azîz Oruç, Elîf Ungur, Îbrahîm Koyuncu, Lezgîn Akdenîz, Mazlum Guler, Mehmet Şahîn, Mehmet Alî Ertaş, Neşe Toprak, Omer Çelîk, Ramazan Gecîken, Remziye Temel, Serdar Altan, Sûat Doguhan, Zeynel Abîdîn Bulut, Abdurrahman Oncu û rojnamegerên bi awayekî serbest tên darizandin Esmer Tunç, Îbrahîm Bayram û Mehmet Yalçin de îdianame amade kir. Îdianame ji 728 rûpelan pêk tê û ji hêla 4’emîn Dadgeha Cezayên Giran a Amedê ve hate qebûlkirin û danişîna ewil da 11’ê tîrmehê.
Dozgeriyê, dosyayên hin kesên piştre li lêpirsînê hatine zêdekirin û yên Gulşen Koçuk, Safiye Alagaş, Mehmet Servet Yîgen, Îhsan Ergunlu, Ayşe Guney, Ayşe Kara û Feynaz Koçuk ji dosyayê veqetand.
Di îdianameyê de bernameyên aydê polîtîkaya weşanê yên televîzyonên kurd ên li derveyî welat hatin rêzkirin û weşandina bername û nûçeyên rojnamegeran ên li ser van televîzyonan weke “têkiliya rêxistinî” hate nirxandin. Di îdianameyê de hat gotin ku bi weşandina bername û nûçeyan re “sûcê endamtiya rêxistinê” hatiye kirin û bi vê îdiayê ji bo rojnameger Azîz Oruç, Elîf Ungur, Îbrahîm Koyuncu, Lezgîn Akdenîz, Mazlum Guler, Mehmet Şahîn, Mehmet Alî Ertaş, Neşe Toprak, Omer Çelîk, Ramazan Gecîken, Remziye Temel, Serdar Altan, Sûat Doguhan, Zeynel Abîdîn Bulut, Abdurrahman Oncu, Esmer Tunç, Îbrahîm Bayram û Mehmet Yalçin ji 7 sal û 6 mehan heta 15 salan cezayê hefsê hate xwestin.