Çalakiyên protestoyî yên li dijî tayînkirina qeyûman a li şaredariyên Bajarê Mezin a Mêrdînê, Êlih û Xelfetî ya Rihayê berdewam in. Di roja 11’emîn a protestoyan de xelkê Êlihê li Parka Yilmaz Guney hatin gel hev. Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir, parlamenterên Partiya Wekhevî û Demokrasiyê ya Gelan (DEM Partî), aktîvîstên Tevgera Jinên Azad (TJA), Meclisa Dayikên Aştiyê û şandeyeke ji Şirnexê hatî jî di meşê de cih girtin. 

 

Girseya ku ber bi Xaçerêya Basinê ve dest bi meşê kir, di meşê de dirûşmên “Bijî berxwedana Batmanê”, “Jin jiyan azadî”, “Qeyûm talan e berxwedan jiyan e” û “Em ê bi berxwedanê bi ser kevin” berz kir. 

 

ESNAFAN PIŞTGIRÎ DAN MEŞVANAN

 

Pankarta “Qeyûm biaxive tu ji ku yî?” ku şandeya Şirnexê bi xwe re anîbû di meşê de hate hilgirtin. Welatiyên derdorê jî bi çepik û nîşaneyên serkeftinê piştgirî dan meşvanan. Esnafekî jî av da meşvanan. Di meşê de coşeke mezin hebû û meş li Xaçerêya Basinê bi dirûşmên “Qeyûmê dizek” û “Dê qeyûm biçe gel dê were” bi dawî bû. 

 

Hevserokê DEM Partiyê yê Êlihê Mûstafa Mesût Tekîk piştî meşê axivî û got ku berxwedana gel a li dijî xespkirina îradeyê bênavber didome. Tekîk, diyar kir ku heta encamê bi dest dixin dê têkoşîna xwe bidomînin. 

 

‘EM Ê BI HEV RE TÊBIKOŞIN’

 

Hevserokê DEM Partiyê yê Şirnexê Abdullah Gungen jî diyar kir ku ew ê her tim li ziman, çand û nirxên xwe xwedî derkevin û wiha dom kir: “Gelê me xwedî kevneşopiya berxwedanê ye û her tim li ber xwe da. Dinya şahidê têkoşîna gelê kurd û talan van e. Em ê bi hev re têbikoşin.” 

 

‘AGIRÊ AZADIYÊ ROJ BI ROJ MEZIN DIBE’ 

 

Parlamentera Şirnexê Newroz Uysal Aslan jî got ku ew bi pergaleke dizîker, talanker û xespkar re rû bi rû ne û ev tişt anî ziman: “ Gelê kurd çiraya azadiyê vêxistiye û kesek dê nekare vî agirî vemirîne. Ev agirê azadiyê roj bi roj mezin dibe. Em ê destûrê nedin talankirina şaredariyan. Berxwedana gel rewa ye û tişta nerewa jî xespkirina îradeya gel e.” 

 

Hevşaredara Êlihê Gulistan Sonuk jî wiha got: “Ji bilî polîs û leşkeran kesek nikare bikeve şaredariya hatiye dagirkirin. Ev 11 roj in zarok, jin, ciwan û kal û pîr bi fermana qeyûm tên îşkencekirin. Gelê Êlihê salên 90’î jiya. Li dijî wan zextan berxwedaneke mezin nîşan da. Serkeftin nêz e. Ne talanker lê gelê me dê qezenc bike.” 

 

UÇAR: JI BO BIDAWÎKIRINA REJÎMA TECRÎDÊ EM LI QADAN BIN 

 

Hevseroka Giştî ya DBP’ê Çîgdem Kiliçgun Uçar jî mirina 5 zarokan a li Îzmîrê bi bîr xist û got ku kesên pariyê nan ê gel di dizin û gel neçarî mirinê dikin, hewl didin bi çerxa qeyûman xwe û alîgirên xwe dewlemend bikin. Bi domdarî Uçar, got ku heta meseleya kurd neyê çareserkirin dê tu pirsgirêkên piralî çareser nebin û wiha bi dawî kir: “Îktîdara xwe bi şer li ser pêyan digire, polîtîkaya qeyûm xist meriyetê. Di pêvajoya çareserî û muzakereyan de birêz Ocalan di şertên newekhev de gotin û hêza çareseriyê nîşan da. Îktîdara AKP-MHP’ê ku dijminê edalet û demokrasiyê ne, çareseriyê naxwazin. Heke daxwaza wan a çareseriyê hebe, bila tecrîda li Îmraliyê rakin û fikrên birêz Ocalan bigihijin gel. Banga me ji bo her kesên demokrasiyê dixwazin ew e ku di roja 17’ê mijdarê de li Êlihê bin. Li dijî rejîma tecrîdê, ji bo parastina azadiyê em li qadan bin.” 

 

Daxuyanî bi dirûşmên “Qasidê aştiyê li Îmraliyê ye”, “Bijî Serok Apo” û “Em ê bi berxwedanê bi ser kevin” bi dawî bû. 

 

Berxwedana gel a li dijî xespkirina îradeyê ya li Xaçerêya Basinê didome.