STENBOL - Dayikên Şemiyê di çalakiya vê hefteyê de aqûbeta Huseyîn Taşkaya pirsîn ku 31 sal berê li Sêweregê ji hêla leşkeran ve hatibû binçavkirin û ji wê rojê ve agahî jê nayên girtin. Dayikên Şêmiyê xwestin faîl bên cezakirin.

 

Dayikên Şemiyê/Mirovên Şemiyê di hefteya 1028'emîn de li Qada Galatasarayê civiyan û li aqûbeta windayên xwe yên di binçavan de hatine windakirin pirsin. Di çalakiyê de wêneyên windayên xwe û qurnefîl girtin destê xwe. Gelek parêzvanên mafên mirovan û Hevberdevka Kongreya Demokratîk a Gelan (HDK) Meral Daniş Beştaş tevlî çalakiyê bûn. Di çalakiya vê heftê de li aqûbeta Huseyîn Taşkaya ê ku ji hêla leşkeran ve hat binçavkirin û dû re agahî jê nehat girtin hat pirsîn. 

 

‘ENDAMÊN EŞÎRÊ BÛNE DEWLETA DI NAVA DEWLETÊ DE’

 

Bûka Huseyîn Taşkaya Ayşe Taşkaya di çalakiyê de axivî û diyar kir ku Huseyîn Taşkaya 42 salî û bavê 4 zarokan bû û li Sêweregê mutahîtî dikir wiha dirêjî da axaftina xwe: "Ji ber ku desthilatdariya navçeyê di destê êşîra Bucak de bû, gelek binpêkirinên mafan pêk dihatin. Di Rapora Susurlukê ya 13'yê Tebaxa 1997'an de ku ji aliyê Lijneya Teftîşê ya Serokwezîrtiyê ve hatiye amadekirin de, hat diyarkirin ku hêzên ewlekariyê meyla operasyonên li herêmê bi tevahî derbasî Eşîra Bucakê kirine û endamên çekdar ên eşîrê derketine holê bûne wek 'dewletek di nava dewletê de'."

 

Ayşe Taşkaya bi bîr xist ku Huseyîn Taşkaya binpêkirinên mafan ên li Sêweregê rexne dikir, ji ber vê yekê bû hedefa eşîra Bucak û wiha got: “Ji ber ku zext û gef zêde bûn, malbata xwe şand Stenbolê. Ew jî li mala mamê xwe ma, heta ku karê xwe bide ser hev. Di 6'ê Kanûna 1993'yan de leşker, polîs û cerdevanên ji eşîra Bucak ên ku bi konvoyek ji 30 wesayîtan pêk dihat hatin mala mamê wî ya li taxa Baglar a Siwêregê û Huseyîn Taşkaya binçav kirin." 

 

HEMÛ SERLÊDAN BÊENCAM MAN

 

Ayşe Taşkaya, anî ziman ku malbata Huseyîn Taşkaya ji bo rewşa kurê xwe bipirse serî li cendirme, polîs, dozger û walîtiyê da û wiha bi lêv kir: "Piştî serlêdanên me rayedarên leşkerî îdia kirin ku Huseyîn Taşkaya piştî binçavkirinê demek kin radestî polîsan hatiye kirin. Polîsan jî gotin 'Ne li cem me ye, biçin ji Sedat Bucak bipirsin' Parlamenterê DYP'ê yê wê demê, serokê eşîr û cerdevan Sedat Bucak jî got 'Tîmên me ew girtin lê radestî dewletê kirin. Em ji niha û pê de tiştekî nizanin, dewlet dizane'. Hemû hewldanên malbatê bê encam man û careke din agahî ji Huseyîn Taşkaya nehat. Serdozgeriya Komarê ya Siwêregê erka xwe ya lêkolînkirina bûyerê û cezakirina sûcdaran pêk neanî. Binçavkirina Huseyîn Taşkaya ya ku xizmên wî û hemû şêniyên taxê şahidî kir, weke 'îdiaya razber a malbatê' nirxand û biryara neşopandinê da. Em di 31'emîn salvegera windakirina wî de careke din bi bîr tînin; binçavkirina Huseyîn Taşkaya nehat qeydkirin. Heta niha derbarê wî de tu agahî nehatine dayîn. Yên ku Huseyîn Taşkaya winda kirin, firsend hat dayîn ku sûcên xwe veşêrin, şopa xwe veşêrin û ji berpirsiyariyê birevin."

 

‘DÊ TÊKOŞÎNA ME BIDOME’

 

Ayşe Taşkaya diyar kir ku ew ê ji bo windayan edaletê bixwazin û wiha dawî li axaftina xwe anî: “Di hefteya xwe ya 1028’an de em careke din bang li rayedarên darazê dikin; erka dozger û dadgehan e ku der barê windakirina Huseyîn Taşkaya ya di binçavan de rastiyan eşkere bikin, kes û rêxistinên sûc kirine nas bikin û ceza bikin. Vê erkê bi cih bînin. Çiqas sal jî derbas bibin em ê dev ji daxwaza edaletê ya Huseyîn Taşkaya û hemû windahiyên xwe bernedin û bi bîr bînin ku divê dewlet li gorî pîvanên hiqûqa gerdûnî tevbigere."

 

Çalakî bi dayîna qurnefîlên li qadê bi dawî bû.