Rojnameger Nazim Daştan û Cîhan Bîlgîn dema geşedanên li Bakur û Rojhilatê Sûriyeyê dişopandin, di encama êrişa bi SÎHA’yan a dewleta tirk de hatin qetilkirin. Gelek kesan li ser hesabên medyaya dijîtal bertek nîşanî qetilkirina rojnamegeran dan. Siyasetmedar, rojnameger û rêxistinên civaka sivîl, qetilkirina rojnamegeran şermezar kirin. 

 

Bertekên li dijî qetikirina rojnamegeran wiha ne: 

 

OHD: EM Ê TÊKOŞÎNA HEQÎQETÊ JI BÎR NEKIN  

 

Komeleya Hiqûqnasên ji bo Azadiyê (OHD): “Kedkarên Çapemeniya Azad Nazim Daştan û Cîhan Bîlgîn dema geşedanên li Bakur û Rojhilatê Sûriyeyê dişopandin, li ser rêya di navbera Bendava Tişrînê û bajarokê Sirînê de hedef hatin girtin. Her du rojnameger, bi êrişa SÎHA’yan a Tirkiyeyê hatin qetilkirin. Ajokarê wesayîtê Ezîz Hec Bozan jî birîndar bû. Cîhan Bîlgîn û Nazim Daştan ev demekî dirêj e geşedanên li Bakur û Rojhilatê Sûriyeyê bi raya giştî re parve dikirin. Çapemeniya Azad, dengê gelan, baweriyan, kesên rastî cihêkariyê tên, bindetan, jinan, zarokan û xwezayê ye. Em, vê êrişa li dijî mafê xwegihandina heqîqet û nûçeyê ya gel hatiye kirin şermezar dikin û qebûl nakin. Em ê têkoşîna heqîqetê ya kedkarên Çapemeniya Azad ji bîr nekin.! 

 

DBP: ROJNAMEGER HEDEF TÊN GIRTIN

 

Partiya Herêmên Demokratîk (DBP): Em bi xemgînî jê agahdar bûn ku rojnameger #NazımDashtan û #CîhanBilgîn di encama êrişên dewleta tirk de bi SÎHA’yan hatine qetilkirin. Her du rojnameger weke kedkarên Çapemeniya Azad dibûn dengê rastiya Rojava. Ên ku bi dagirkerî, qetlîam û pêkanînên ne hiqûqî îradeya gelê Rojava hedef digirin hewl didin li ser sûcên şer û qetilkirina sivîlan bigirin. Ji ber vê yekê jî rojnamegeran hedef digirin. Divê neyê jibîrkirin ku, yên ku li dijî van êrişan bêdeng dimînin dibin perçeyên sûcên şer. Divê li hemberî van êrişan têkoşîneke xurt bê meşandin da ku êrişên li ser dijî gelê Rojava bên rawestandin. Bi vê mebestê em ji Çapemeniya Azad re sersaxiyê dixwazin. 

 

TJA: KESEK NIKARE PÊNÛSA HEQÎQETÊ BÊDENG BIKE 

 

Tevgera Jinên Azad (TJA): Rojnameger Nazim Daştan û Cîhan Bîlgîn li Rojava di êrişa bi SÎHA’yan a Tirkiyeyê de hatin qetilkirin. Em, kujerên ku azadiya jinê û dengê heqîqetê hedef digirin baş nas dikin. Ji Nagihanê heta Cîhanê, dê kesek nekare pênûsa heqîqetê bêdeng bike! 

 

Parlamenterê DEM Partiyê Serhat Eren: Rojnameger Nazim Daştan û Cîhan Bîlgîn, ji bo heqîqeta l i Rojava bi tevahiya cîhanê re ragihînin derketin rê lê belê bi SÎHA’yên kesên vê heqîqetê înkar dikin ve hatin qetilkirin. Xwestin bi bomeyan dengê kesên bi pênûsa xwe têdikoşin qut bikin. Çapemeniya Azad bêdeng namîne! 

 

Rojnameger Candan Yildiz: Hedefgirtina rojnamegeran a di şer û pevçûnan de sûcekî navneteweyî ye. Mixabin rêya Îsraîlê vekirî dişopînin. Mixabin. 

 

Hevdîrektorê MLSA’yê Veysel Ok: Hedefgirtina rojnamegeran al i herêmên şer, binpêkirina hiqûqa mirovparêz a navneteweyî û Peymana Cinêvê ye. Divê jiyan û qadên xebatê yên rojnamegeran bên parastin û azadiya çapemeniyê di hemû şert û mercan de bê misogerkirin. 

 

Şaxa Sendîkaya Kedkarên Tenduristî û Xizmetên Civakî (SES) a Amedê: Rojnameger Nazim Daştan û Cîhan Bîlgîn di êrişa bi SÎHA’yan de jiyana xwe ji dest dan û ev yek tê wateya tunehesibandina qeydên hiqûqa navneteweyî. Em hestên xwe yên piştevanî û sersaxiyê bi malbatên rojnamegerên hatine qetilkirin û kedkarên Çapemeniya Azad re parve dikin. 

 

Hevseroka Giştî ya Komeleya Mafên Mirovan (ÎHD) Eren Keskîn: Du sivîl, du rojnameger.. dema karê xwe dikirin... êşeke pir mezin e, hêrseke pir mezin... 

 

Welatparezên Sosyalîst: Dê êriş û komkujiyên faşîzm û çeteyên wê nekarin rê li meşa me ya şoreşê bigirin. Dê Nazim û Cîhan di têkoşîna me de her bijîn. 

 

Rojnameger Fehîm Işik: Barbariyê careke din rojnameger hedef girt. Hevalên me nûçegihana Ajansa Nûçeyan a Hawarê Cîhan Bîlgîn û rojnameger Nazim Daştan şehîd bûn. Cîhan Bîlgîn û Nazim Daştan, di 19’ê Kanûna 2024’an de dema karê xwe yê rojnamegeriyê dikirin, saet derdora 15.20’ê de li ser rêya di navbera Bendava Tişrînê û bajarokê Sirînê de bi SÎHA’yên dewleta tirk a dagirker ve hatin qetilkirin. Em ê ji bîr nekin, dê nedin jibîrkirin! Em ê pênûsa wan li erdê nehêlin û têkoşîna wan bidomînin... 

 

Parlamenterê DEM Partiyê Sezaî Temellî: Tirkiyeyê di êrişa xwe ya bi SÎHA’yan a li dijî Bakur û Rojhilatê Sûriyeyê e rojnameger Nazim Daştan û Cîhan Bîlgîn qetil kir. Ajokarê wesayîtê Ezîz Hec Bozan jî birîndar bû. Heqîqet û nûçeyên rast, mafê herî bingehîn ê gelan e! Nazim Daştan û Cîhan Bîlgîn, wêraniya şer, êşa gelan û rastî raxistin berçavan lewma hatin qetilkirin. Ez vê êrişa nemerdane lanet dikim. Hûn nikarin heqîqetê bêdeng bikin.! 

 

Hevserokê Kongreya Civaka Demokratîk (KCD) Berdan Ozturk: Rojnameger Nazim Daştan û Cîhan Bîlgîn dema li Rojava nûçe dişopandin, bi SÎHA’yan hatin qetilkirin. Îktîdara ku ji bo tunekirina destkeftiyên gelê Kurd serî li hemû sûcên li dijî mirovahiyê dide, ne ji ber kirina sûc lê ji derketina holê ya sûc ditirse. Heqîqet, ji neyartiya li hemberî Kurdan mezintir e. 

 

Hevseroka Komeleya Rojnamegeran a Dîcle Firatê (DFG) Dîcle Muftuoglû: Nazim... Ji ber ku dema DAIŞ’ê ji bo êrişî Kobanê bikin li ser sînor derbas dibûn kişandibû lewma hedef hate girtin, hate girtin. Dema li Rojava nûçe dişopand birîndar bû lê xwe paşve nekişand. Em şahidên têkoşîna te ya heqîqetê ne. Em ê vê têkoşînê bidomînin. Berê kadraja wî her tim li têkoşîna gelan bû. 

 

Kasim Taşdogan: Heqîqet namire, bijî Çapemeniya Azad.”