Hevseroka Giştî ya Konfederasyona Sendîkayên Kedkarên Cemaweriyê (KESK) Ayfer Koçak têkildarî peyamên Rêberê PKK’ê Abdullah Ocalan ên piştî hevdîtina bi Şandeya Îmraliyê ya DEM Partiyê û nîqaşên li ser “pêvajoyê” axivî. Ayfer Koçak, diyar kir ku têkoşîna aştiyê pêşeşertê têkoşîna kedê ye û got: “Di dema şer de çavkanî ji bo wêraniyê tên bikaranîn. Pergaleke adilane ya ji bo kedkaran, bi bidawîkirina polîtîkayên şer pêkan e.” 

 

KED Û AŞTÎ

 

Ayfer Koçak, diyar kir ku heke aştî nebe ne demokrasî ne jî têkoşîna kedê pêş nakeve û ev tişt anî ziman: “Têkoşîna kedê di heman demê de berfirehkirina demokrasiyê ye. Polîtîkayên şer herî zêde bandorê li kedkaran dike. Ji bo me tişta pîroz, mafê jiyanê ye. Şer, rê li ber rantê, xizaniyê vedike. Di şer de berîka bazirganên çekan û sermayedarên li eniyê tije dibe. Ev rant jî li ser berîka kedkaran teşe digire. Krîza aborî ya heyî girêdayî polîtîkayên şer in. Erdogan digot; ‘Ma hûn dizanin ka her fîşekek bi çiqas pere ye?’ Ev gotin, îtîrafa polîtîkayên şer e. Heqê fîşekên şer ji berîka kedkaran derdikeve.” 

 

‘PARA HERÎ MEZIN JI BO ŞER TÊ VEQETANDIN’ 

 

Ayfer Koçak, diyar kir ku li rexekî qala aştiyê û li rexa din jî êriş ser Bakur û Rojhilatê Sûriyeyê tên kirin û wiha got: “Ev nakokî ye. Li her devera cîhanê di şer de zarokên xizan û kedkaran di şer de dimirin. Heke ji sedî 60’ê karkeran di bin sînorê birçîtiyê de be, sedema vê polîtîkayên şer in. Ji ber ku para herî mezin a çavkaniyan ji bo şer tê veqetandin.” 

 

‘KÎ DIKARE LI DIJÎ VAN FIKRAN DERKEVE?’ 

 

Bi domdarî Ayfer Koçak bal kişand ser peyamên Abdullah Ocalan û wiha got: “Peyama herî girîng jî demokratîkbûn bû. Ma kî dikare li dijî van fikran derkeve? Li gorî me dema qadên azadiyê hatin vekirin û gel karî xwe îfade kir, dê zemîna şer jî nemîne. Meseleya Kurd tevahiya Rojhilata Navîn eleqedar dike lewma dîsa nîqaşên ser aştiya navxweyî destpêkirin. Divê gavên demokratîk tavilê bên avêtin. Divê pêvajoyeke ku hemû derdoran lihevkirî û destkeftiyên demokratîk hatine pênasekirin bê meşandin. Divê hemû derdorên civakê bibin parçeyeke van nîqaşan. Divê pêvajoyeke zelal û eşkere be. Divê îktîdar vê pêvajoyê şefaftir bike.” 

 

Ayfer Koçak, bi bîr xist ku ji ber “pêvajoya çareseriyê” ya di navbera salên 2013-2015’an de ceza li gelek siyasetmedar, nûnerên civaka sivîl û welatiyan hatiye birîn û got: “Lewma pêdivî bi zemînekî hiqûqî û demokratîk heye. Îktîdar dibêje ‘divê em aştiyê bikin’ lê li hêla din pêşiya gavên demokratîkbûnê digire. Baweriya kesekî bi edaletê nemaye. Îktîdar biryarên AYM’ê qebûl nake. Hêj jî mirov di hefsê de ne. Heke hûn zemînî demokratîk nekin, wê demê wateya lêgerîna aştiyê nabe. Lê heke îxtîmalekî herî biçûk jî hebe em ê piştgiriyê bidin.” 

 

'PÊDIVÎ BI RUHÊ GEZIYÊ HEYE’

 

Ayfer Koçak, anî ziman ku di dema Geziyê de gelek derdor û kesên xwedî fikrên cuda hatibûn gel hev û got: “Hewcehî bi ruhê Geziyê heye. Divê kesên xwedî fikrên cuda bên gel hev û pêvajoyeke wiha be.” 

 

 MA / Firat Can Arslan