Kampanyaya “Ji Abdullah Ocalan re azadî, ji pirsgirêka kurd re çareseriya demokratîk” ku ji aliyê Kurdistanî û dostên wan ve di 10’ê Cotmeha 2023’yan de hat destpêkirin, li gelek deverên Ewropa, Tirkiye û Kurdistanê bi çalakiyan berdewam dike. Di çarçoveya kampanyayê de bi beşdariya 26 nûnerên 26 bajaran "Meşa Dirêj" di 21'ê Çileyê de li bajarê Lorîent ê Fransayê hat destpêkirin.

 

Meş wê bi mîtîngeke girseyî ya 15’ê Sibatê li Strasboûrgê bi dawî bibe, lê wê li bajarên li ser rê civîn, panel, belavkirina belavokan û civînên bi dînamîkên herêmî bêm çêkirin. Çalakger bi dosyeyekê daxwazên xwe wê di civînan de pêşkêş bikin û armanc dikin ku ji bo pêvajoya pêş xebatên dîplomasiyê çêbikin. 

 

 

Hevseroka Kongreya Civaka Demokratîk a Kurd a Ewropayê (KCDK-E) Zubeyde Zumrutê têkildarî armanc û girîngiya meşa 15'ê Sibatê û çalakiyên girseyî yên 15'ê Sibatê axivî.

 

ARMANCA MEŞÊ 

 

Zubeyde Zumrutê diyar kir ku armanca meşê azadiya fizîkî ya Abdullah Ocalan, çareseriya demokratîk a pirsgirêka kurd, naskirina statuya Bakur û Rojhilatê Sûriyeyê û jiyana hevpar a gelan e û got: "Em ê bi sedan kes li hev bicivin." Zubeyde Zumrutê diyar kir ku wê meş bi mîtînga bi beşdariya bi hezaran kesî ya li Strasboûrgê bê lidarxistin bi dawî bibe û got: “Ji bo me girîng e ku meş heta 15’ê Sibatê bê lidarxistin û rawestgeha dawî jî Strasboûrg be. Ji ber ku Komîteya Pêşîgirtina li Îşkenceyê ya Ewropayê (CPT) û Konseya Ewropayê ku para wan di dewama komplo û tecrîdê de heye, li Strasboûrgê ne, peyamên ku em ê bidin cîhanê girîng dikin." 

 

‘EM Ê BI SEFERBERIYÊ 15'Ê SIBATÊ PÊŞWAZÎ BIKIN'

 

Zubeyde Zumrutê diyar kir ku wan 15'ê Sibatê di demeke ku li ser pirsgirêka kurd gengeşeyên nû tên kirin pêşwazî dikin û diyar kir ku tecrîda li ser Abdullah Ocalan hê jî didome. Zubeyde Zumrutê bal kişand ser wê yekê ku nêrîna dewletê ya der barê pirsgirêka kurd de neguheriye û destnîşan kir ku kampanyaya ku ev 2 sal in didome heta azadiya fizîkî ya Abdullah Ocalan wê bidome. Zubeyde Zumrutê got: "Em ber bi 15'ê Sibatê ve diçin, lê bi vê re ji bo azadiya Rêberê xwe em ê bi ruhê seferberiyê xebatên xwe bimeşînin."

 

Zubeyde Zumrutê diyar kir ku Abdullah Ocalan 26 sal in li dijî komploya li Îmraliyê li ber xwe dide û got ku hevdîtinên li Îmraliyê encama têkoşîna di çarçoveya kampanyayê de ye. Zubeyde Zumrutê got: “Heta niha hevdîtina malbatê ya bi Rêber Apo re û 2 hevdîtinên Şandeya Partiya Wekhevî û Demokrasiyê ya Gelan (DEM Partî) pêk hatine. Lê ev axaftin nayê wê wateyê ku Rêber Apo azad bûye. Heta ku Rêber Apo bi awayekî fizîkî azad nebe û pirsgirêka kurd li ser bingehê demokratîk neyê çareserkirin, wê her tişt ji bo me kêm bimîne. Em ê jı bo van daxwazan têbikoşin. Di çalakiyên girseyî yên 15’ê Sibatê de li Strasboûrgê wê bi beşdariya bi sed hezaran kesî ev daxwaz bi rengekî balkêştir werin zimön. Em ê bi sed hezaran kesî re bibin yek û azadiya fızîkî ya Rêber Apo biqîrin."

 

‘PIRSGIRÊKA KURD DI ROJEVA EWROPAYÊ DE YE'

 

Zubeyde Zumrutê diyar kir ku wê di 15’ê Sibatê de li gelek navendên Ewropayê çalakî bên lidarxistin û got: “Em îsal di hemû meşên ku li Ewropayê tên lidarxistin de beşdariyeke xurt dibînin. Armanca me ew e ku em li Strasboûrgê li gorî par bi girseyî kom bibin. Ji ber ku Fransa cihek e ku hem potansiyela kurdan û hem jî dostên kurdan lê kom bûne û tê payîn ku beşdarbûn zêde be. Di vî warî de gel bi pêşengî û bi ruhê seferberiyê hewl dide xebat û plansaziyê bike."

 

Zubeyde Zumrutê diyar kir ku pirsgirêka kurd di rojeva Ewropayê de ye û got ku paradîgmaya "azadîparêz" a Abdullah Ocalan li hemû cîhanê beramberiyeke xwe heye. Zubeyde Zumrutê wiha berdewam kir: “Gelek ciwanên enternasyonalîst ên ku bi me re beşdarî xebatan dibin, dibêjin, 'Em êdî ne heval in, em parçeyek ji vê têkoşînê ne. Ev paradîgma me jî eleqedar dike.' Yanî hem ji bo kampanyayê, hem ji bo çalakiyên 15’ê Sibatê û hem jî ji bo Rêber Apo li Ewropayê xwedîderketin û eleqeyeke cidî heye. Bi taybetî ji bo statuya Rojavayê gengeşeyên cidî li ser xeta parastinê ya çawa pêş bixin hene. Dîsa ez dikarim bibêjim ku li vir heyecan û eleqeyeke cidî ya ji bo hevdîtinên bi Rêbertiyê re heye.

 

Girîng e em di vê pêvajoyê de destê Rêber Apo xurt bikin. Ji bo hevdîtin bi wesf bin, divê dewlet ji bo rakirina tecrîda li ser Rêber Apo û çareseriya pirsgirêka kurd li ser bingehê demokratîk gavan biavêje. Em ê di hemû meş û çalakiyên xwe de vê peyamê bidin: Heta ku pirsgirêka kurd çareser nebe û Rêberê Gelê Kurd azad nebe em ê qadan terk nekin û em ê kampanyayê hîn berfirehtir bikin. Peyama me ya din jî naskirina Rojavayê ye. Êrişa li ser Rojavayê êrişa li dijî paradîgma û îdeolojiya gelê kurd e. Ji bo vê jî girîng e ku ji Ewropayê dengekî xurt were bilindkirin. Em ê bi beşdariya sed hezaran bersivê bidin tasfiyeyê û ferzkirina şikandina îradeyê."

 

MA / Esra Solîn Dal