ENQERE - Serokwekîla Koma DEM Partiyê Gulistan Kiliç Koçyîgît bal kişandin ser komkujiyên li Sûriyeyê li ser Elewiyan û got: “Peymana HSD’ê bi Hikûmeta Demkî ya Sûriyeyê re mohrkirî, ji bo pêşîlêgirtina komkujiya ser Elewiyan gavekî gelek girîng e.”
Serokwekîla Koma DEM Partiyê Gulistan Kiliç Koçyîgît tevî parlamenterên partiyê têkildarî komkujiyên HTŞ û komên girêdayî Tirkiyeyê li Sûriyeyê li dijî Elewiyan dikin, daxuyanî dan. Daxuyanî, li Deriyê Çapemeniyê ya Meclisê hat dayin. Gulistan Kiliç Koçyîgît, diyar kir ku di komkujiyê de jin, zarok û kal û pîr tên qetilkirin û got: “Mixabin ev komkujî li pêş çavên cîhanê tên kirin. Tevî bertekan jî hewldanên ji bo pêşîlêgirtina komkujiyê hewldan têr nekirin. Herî kêm 3 hezar Elewî hatin qetilkirin. Em vê komkujiya li pêş çavên hemû cîhanê tê kirin şermezar û lanet dikin.”
'RÊVEBERIYA HTŞ’Ê BERPIRSYAR E’
Gulistan Kiliç Koçyîgît, da zanîn ku Rêveberiya Xweser a Bakur û Rojhilatê Sûriyeyê ji destpêkê ve ji bo pêşîlêgirtina komkujiya li dijî Elewiyan nerazîbûn nîşan da û wiha domand: “Di daxuyaniyên xwe de û bi diyaloga bi Rêveberiya Demkî ya Sûriyeyê re ji bo pêşîlêgirtina komkujiyê hewl dan. Em van hewldanan pîroz dikin. Komkujî hêj didomin. Rêveberiya HTŞ’ê di encama bertekan de neçar ma ku komkujiyê qebûl bike û got ku dê di vê mijarê de komîsyonekê ava bikin û hesabê ji kiriyaran bipirsin. Ev gotin girîng e lê kêm e. Peywira wan a ewil, pêşîlêgirtina komkujiyê ye. Em careke din bang dikin ku tavilê berpirsyaran bigirin û ceza bikin.”
‘EM QEBÛL NAKIN’
Gulistan Kiliç Koçyîgît, diyar kir ku li Tirkiyeyê derdorên nêzî AKP’ê hewl didin vê komkujiyê bi navê “alîgirên Esad” rewa nîşan bidin û got: “Em van hewldanên ji bo rewakirina qirkirinê qebûl nakin. AKP’ê ev komkujî jinedîtî ve hat. Girêdayî terorê û provakasyonên hêzên derve kirin. Divê tavilê dev ji vê helwesta xwe berdin. Li gorî agahiyên bi raya giştî re parve kirin, îdia hene ku ev komkujî tevek bi destê çeteyên SMO’yê tên kirin. Gelo Tirkiye ji ber vê yekê ev helwest nîşan da? Gelo Tirkiye hewl dide SMO’yê biparêze? Divê Rêveberiya Demkî ya Sûriyeyê hesaba van komkujiyan bipirse û bi raya giştî ya cîhanê re parve bike. Em careke din van komkujiyan şermezar dikin û dibêjin ku bi gelê Elewî re ne.
JI BO AVAKIRINA SÛRIYEYÊ GIRÎNG E
Şevê din geşedaneke girîng çêbû. Di navbera Serokê HSD’ê Mazlum Ebdî û Serokê Hikûmeta Demkî ya Sûriyeyê Colanî de peymanek hat îmzekirin. Ev peyman, ne tenê ji bo Kurdan, ji bo hemû gel û baweriyên cuda yên li Sûriyeyê tev li rêveberiya Sûriyeyê bibin û mafên wan bên misogerkirin, destpêkeke girîng e. Ev peyman, di halê hazir de ji bo pêşîlêgirtina komkujiya li dijî Elewiyan jî gavekî pir girîng e. Beriya peymanê jî piştî peymanê jî Rêveberiya Bakur û Rojhilatê Sûriyeyê banga rawestandina komkujiyan kirin û bi hikûmeta demkî re axivîn. Xala têkildarî ragihandina agirbestê gelek girîng e. Ev peyman dê bandoreke erênî li Tirkiyeyê û herêmê jî bike.”