AMED - Ekrem Îmamoglû li Amedê axivî û got: “Heta ku Kurd bibêjin ‘pirsgirêka me heye’ pirsgirêka Kurd heye. Ev pirsgirêk, bi rêya diyalog, bi guhdarîkirina her kesî, bi qanehkirina tevahiya gel û li ser zemîna Meclisê dikare bê çaresekirin.” 

 

Bernamzetê CHP’ê yê serokkomariyê Ekrem Îmamoglû, di çarçoveya pêşhilbijartina partiya xwe ku dê di 23’yê Adarê de li dar bixe, li Amedê bi CHP’iyan re civiya. Civîn, li Navenda Kongreyê ya ÇandAmedê bi beşdariya gelek kesên ji bajarên derdorên cuda hatin re hat lidarxistin. 

 

Piştî silavdayina serokên bajarên herêmê û axaftina destpêkê, Îmamoglû axivî. Îmamoglû, di axaftina xwe de wiha got: “Amed, wijdana vê xakê ye. Em ji bo pêşerojeke nûwaza ya li ser vê xaka qedîm a hezaran salan li vir in.” 

 

Îmamoglû, bi domdarî got ku ew piştgiriyê dide Amedsporê û dê vê piştgiriya xwe bidomîne. 

 

Îmamoglû, diyar kir ku dê rêveberiya herî demokrat û azadîxwaz a Tirkiyeyê ava bikin û got: “Em ê pergaleke demokrasiyê ya xurt ava bikin. Derdê me ne îqbala siyasî ye, derdê me bidawîkirina vê pergala îsraf û îstîbdatê ye. Em ji bo li îradeya gel qeyûm neyên tayînirin, ji bo hêza darazê ji hêla siyasetê ve weke çek neyê bikaranîn derketin rê.”

 

‘DIVÊ LI MECLISÊ BÊ ÇARESERKIRIN’

 

Bi domdarî Îmamoglû got ku divê çek êdî bêdeng bibin û wiha pê de çû: “Divê pevçûn bi dawî bibin. Çareserî, divê bi diyaloga hemû derdorên civakî bibe. Peywira dewletê ew e ku Kurd û hemû derdorên civakê xwe xwediyên vî welatî, hevparên wekhev hîs bikin. Heta ku Kurd bibêjin ‘pirsgirêka me heye’, li holê pirsgirêka Kurd heye. Ev pirsgirêk bi rêya diyalogê, bi guhdarîkirina her kesî, bi qanehkirina tevahiya derdorên civakê û li ser zemîna TBMM’ê divê bê çareserkirin. Werin em bibin yek û vê pergala xerab, vê pergala tirsê bi hev re biguherînin. ” 

 

Herî dawî jî Îmamoglû kesên di Komkujiya Helebceyê de hatine qetilkirin bi bîr anî û hêvî kir ku êdî komkujiyên bi vî rengî neyên kirin.