Piştî banga dîrokî ya Rêberê Gelê Kurd Abdullah Ocalan di 27'ê Sibatê de, ji bo çareserkirina pirsgirêka Kurd bi rêbazên demokratîk komîsyonek li meclisê hat avakirin. Komîsyona Hevgirtina Neteweyî, Xwişk-Biratî û Demokrasiyê ku xebatên xwe li meclisê didomîne, vê dawiyê serokên meclisê yên berê guhdarî kir.

 

Hevseroka Giştî ya Komeleya Hiqûqnasên Ji Bo Azadiyê (OHD) Ekîn Yeter Moray ku beşdarî merasîma îmhakirina çekan bû ku di 11'ê Tîrmehê de ji hêla Koma Aştî û Civaka Demokratîk ve li Şikefta Casenê ya bajarê Silêmanî yê Herêma Kurdistana Federe hat lidarxistin, der barê xebatên komîsyonê de nirxandin kir.

 

BERPIRSIYARÎ DIKEVE SER MILÊ RÊXISTINÊN CIVAKA SIVÎL  

 

Ekîn Yeter Morayê diyar kir ku piştî merasîma tunekirina çekan, komê ji wan re ragihandiye ku ew û rêxistinên civaka sivîl berpirsiyariyeke girîng li ser milê wan e. Ekîn Yeter Morayê got: "Lîste radestî me hat kirin. Dema ku lîste radestî me hat kirin, ji me re hat gotin ku bendewariyek heye: 'Em vê lîsteyê radestî civaka sivîl dikin û em hêvî dikin ku civaka sivîl karê xwe bike.' Bi rastî, me hewl da ku vê mîsyonê, ku bi salan di gelek waran de bi hevkariya Komeleya Mafên Mirovan (ÎHD) dikin, bi cih bînin."

 

Ekîn Yeter Morayê destnîşan kir ku bi pêşketina pêvajoyê re komîsyonek li meclisê hatiye avakirin, lê ev komîsyon tenê bi biryara meclisê hatiye damezrandin û bingehek wê ya qanûnî tune ye. 

 

‘XEBATÊN KOMÎSYONÊ PIR GIRÎNG IN' 

 

Ekîn Yeter Morayê girîngiya xebata komîsyonê destnîşan kir û got: "Me pêvajoyek dît ku bernameyek hilweşînê li seranserê avaniya civakî ya li Kurdistanê, nemaze di 10 salên dawî de, bicîh aniye. Em bi encamên giran ên vê pêvajoyê re rû bi rû man, di nav de mafên jinan, zarokan û aliyên ekolojîk û civaka sivîl.. Em bi serdemeke pir dijwar re rû bi rûman. Ji ber vê yekê, vegotin û ravekirina vê pêvajoyê derfeteke mezin e ku meriv nîqaş bike ka em çawa gihîştine vê astê û ev pirsgirêk çawa dikare were çareserkirin."

 

Her wiha Ekîn Yeter Morayê bal kişand ser guhdarîkirina baroya û rêxistinên hiqûqê û got ku neguhdarkirina OHD'ê kêmasiyeke mezin e. Ekîn Yeter Morayê got: "Em behsa saziyeke rêxistinê ya mezin a li Tirkiye û Kurdistanê dikin. Negazîkirina wê nayê qebûlkirin." 

 

‘MUXATAB OCALAN E'  

 

Ekîn Yeter Morayê îşaret bi pêwîstiya guhdarîkirina Abdullah Ocalan a ji aliyê komîsyonê ve kir û got: "Em hemû dizanin ku aştî bi destê kesên ku şer dikin tê bidestxistin. Gelê Kurd, bi hemû mekanîzmayên xwe, bi salan e bi vê rastiya şer re rû bi rû ye. Û bê guman, heke di vê pêvajoyê de bi rastî aştî were sazkirin û heke derfet û îmkana avakirina civateke demokratîk hebe, divê pêşî birêz Ocalan ji aliyê vê komîsyonê ve were guhdarîkirin."

 

'DIVÊ TECRÎD BI DAWÎ BIBE'  

 

Ekîn Yeter Morayê destnîşan kir ku ji bo pêvajo pêş bikeve divê tecrîda li ser Abdullah Ocalan bê rakirin û got ku ew hiqûqnas ji bo vê dê di nava hewldanan de bin. 

 

MA / Melîk Varol