NAVENDA NÛÇEYAN - KCK'ê diyar kir ku li Sûriyeyê serdemeke nû hatiye despêkirin û got, "Çareseriya pirsgirêkan bi feraseta Neteweya Demokratîk mimkun e hemû gel bi pergala Neteweya Demokratîk ve dikarin bi hev re wekhev, demokratîk û azad bijîn."
Hevserokatiya Konseya Rêveber a KCK'ê têkildarî geşedanên dawî yên Sûriyeyê daxuyaniyek nivîskî da. Di daxuyaniya KCK'ê ya ji aliyê Ajansa Nûçeyan a Firatê (ANF) ve hat weşandin de bal hat kişandin ser hilweşîna rejîma Baas a Sûriyeyê û destnîşan kir ku çareserî di paradîgmaya Neteweya Demokratîk de pêkan e.
Hevserokatiya KCK’ê da zanîn ku li Sûriyeyê serdemeke nû destpêkiriye û wiha got: “Di encama pêşketinên du hefteyên dawî yên li Sûriyeyê de rejîma Baas hilweşiya. Bi hilweşîna rejîma Baas re li Sûriyeyê serdemeke nû hatiye destpêkiin. Em bi hêvî ne ku rewşa nû ya derketiye holê, bibe veguherîna hemû gelên li Sûriyeyê bi hev re, wekhev û azad bijîn. Gelên li Sûriyeyê bi dehan salan ji bo afirandina Sûriyeyeke demokratîk û ji bo pêşvebirina jiyaneke azad, demokratîk têkoşiyan û berdêlên giran dan. Gelên Sûriyeyê yên ku êşên mezin kişandin û berdêlên giran dan, vê yekê gelekî heq dikin. Em di wê baweriyê de ne ku gelên li Sûriyeyê xwedî tecrübe û hişmendiyê ne ku vê yekê pêk bînin. Em hêvî dikin ku ev hesreta gelên Sûriyeyê pêk were.”
KCK’ê da zanîn ku careke din derketiye holê ku bi hilweşîna rejîma Baas ve feraseta netew-dewlet têk çûye û wiha got: “Pergala netewe-dewlet a ku ji aliyê modernîteya kapîtalîst ve derketiya holê û ji aliyê hêzên modernîst ên kapîtalîst ve li Rojhilata Navîn hatiye îxrackirin, sedema bingehîn a kûrbûn û kilîtbûna pirsgirêkên civakî ye ku ev sedsal in li Rojhilata Navîn tê jiyîn. Bi pêşketinên li Rojhilata Navîn re careke din derketiye holê ku modela netewe-dewletê ya ku cudahî, cihêrengî û pirrengiya civakê înkar dike û modela ku herî zêde li dijî rastiya mirovahiyê ye û herî zêde dide civakê ye. Rêber Apo rastiya netewe dewletê ya yekperest bi kûrahî analîz kir, nakokiya vê sîstemê bi rastiya mirovahî û civakê re raxist pêş çavan û destnîşan kir ku civak nema tehemûlî pergala yekperest bike û ev pergal wê bê çare bimîne û di encamê de wê li Rojhilata Navîn rêya veguherîna demokratîk were vekirin. Pêşketinên li Sûriyeyê ev rastiya dîrokî ya Rêber Apo destnîşan kiriye piştrast kiriye. Tevî hemû geşedanên di 14 salên dawî de li Sûriyê rû dan, rêjîma Baas ev rastî nedît, di sîstema netew-dewlet a yekperest de israr kir, negihîşt veguhertina demokratîk û di dawiyê de bi dawî bû ku li benda wê bû.”
SÛRIYEYA DEMOKRATÎK
Hevserokatiya KCK’ê da zanîn ku divê li Sûriyeyê feraseta yekperest a netew-dewletê were terikandin, ji bo demokratîkbûna Sûriyeyê gav bên avêtin û wiha got: “Ji bo pêvajoya demokratîkbûna Sûriyeyê dereng nekeve, gel zêdetir êş nekişînin gelek hewldanên me çêbûn. Gelê kurd bi têkoşîna xwe ve her tim Sûriyeyeke demokratîk daxwaz kirin û bingeha vê ava kirin. Em dizanin ku rêveberiya xweser a Rojhilat û Bakurê Sûriyeyê ji bo demokratîkbûna Sûriyeyê di nav hewldanan de ne. Lê belê rejîma Baas di nêzîkatiya netewe-dewlet a yekperest de israr kir û di encamê de krîza li Sûriyeyê kûrtir bû, çareseriya pirsgirêkan hat taloqkirin û gelan bêhtir êş kişandin.
Ji niha û pê ve tişta herî bingehîn pêşketina Sûriyeyeke demokratîk e. Li Sûriyeyeke demokratîk, hemû gelên Sûriyeyê, komên olî, ziman, mezheb û çandên cuda dikarin bi hev re wekhev, azad û wekhev bijîn. Çareseriya pirsgirêkên li Sûriyeyê bi vê yekê pêkan e. Kurd, ereb, dûrzî, tirkmen, asûrî, êzidî, ermenî, nûsayrî, sûnî û hemû cudahiyên li Sûriyeyê dikarin li ser vê bingehê jiyaneke nû ava bikin, bi hev re azad bijîn û Sûriyeyeke nû ava bikin ku mafên her kesî bên naskirin.
Di heman demê de pêşketina wê ya li Sûriyeyê wê bandoreke erênî li tevahiya Rojhilata Navîn bike û piştgiriyeke mezin li demokratîkbûyîna Rojhilata Navîn bike. Gelê kurd bi têkoşîna xwe nîşan da ku ev hêza wan a herî dînamîk e. Weke KCK'ê, ji bo pêşketina feraseta demokratîk a netewe, ku pêşbîniya jiyaneke bi vî rengî dike û xwe dispêre pirrengî, cihêrengî û jiyana bi hev re ya cudahiyan, em ê helwest û têkoşîna xwe bidomînin. Li dijî modela netewe-dewlet a yekperest ku çavkaniya hemû pirsgirêkan e, çareserkirina pirsgirêkan pêkan e û hemû gel bi feraseta neteweya demokratîk bi hev re wekhev, demokratîk û azad bijîn.”
Azadiya civakê bi azadkirina jinê dikare pêk were. Rizgariya jinê cewher û wateya civakîbûnê îfade dike. Sûriyeya nû ya bê afirandin, ancax bi pêşketina azadiya jinê re demokratîk û azadîparêz be. Ji xeta azadiya jinê ti carî tawîz nayê dayîn û gavek bi paş ve nayê avêtin.
LI DIJÎ AZADIYA SÛRIYEYÊ ASTENGIYA HERÎ MEZIN TIRKIYE YE
Dewleta tirk li pêşiya Sûriyeya demokratîk û azad astengiya herî mezin e. Ji bo pêşî li pêşketina jiyana demokratîk û azad a li Sûriyeyê bigire, demeke dirêj e êrîşî Sûriyeyê dike û dagir dike. Tevî ku rejîma Baas hilweşiya jî dewleta tirk dest ji vê helwesta xwe berneda. Dewleta tirk jî mîna rejîma Baas xwedî zîhniyeta netewe-dewlet a yekperest e. Bi êrîşên ku pêş xistiye û çi kiriye re armanc dike ku feraseta despotîk û sîstema yekperest a li Sûriyeyê mayînde bike. Dewleta tirk ne tenê qirkirina kurdan, di heman demê de dixwaze pêşî li veguherîna demokratîk a li Sûriyeyê bigire, sîstema netewe dewlet a yekperest û nêzîkatiya serdestiya despotîk misoger bike û hemû gelên Sûriyeyê di bin qirkirinê de bijîn. Aşkera ye ku dewleta tirk armanceke bi vî rengî dimeşîne û li ser vê bingehê êrîşên xwe yên li hemberî Sûriyeyê didomîne. Bi vê armancê dewleta tirk qaşo Artêşa Sûriyeyê ya Neteweyî ava kir.
Hem bi xwe êrîş dikin û hem jî bi destê Artêşa Neteweyî ya Sûriyeyê êrîşan pêk tîne. Dewleta tirk bi vê nêzîkatiyê êrîşî yekitî û yekparçebûna Sûriyê dike û geşedanên Sûriyê tehdît dike. Divê hemû gel û hêzên Sûriyeyê yên alîgirê Sûriyeyeke nû û jiyaneke demokratîk û azad a bi hev re ya li Sûriyeyê, vê nêzîkatiya dewleta tirk qebûl nekin û li dijî êrîşên dewleta tirk û Artêşa Neteweyî ya Sûriyeyê li ber xwe bidin. Divê li rex berxwedana gelê kurd û gelên Bakur Rojhilatê Sûriyê be. Her wiha em bang li hêzên demokratîk ên cîhanê dikin ku li dijî êrîşên dagirker û qirker ên dewleta T-tirk helwestê nîşan bidin, li cem gelê kurd ê berxwedêr û gelên Sûriyeyê cih bigirin û helwesteke xurt a hevgirtinê xurt bikin.
Gelê Kurd bi têkoşîna ku pêş xistiye re tevkariyeke mezin di têkbirina sîstema netewe dewlet a yekparêz û feraseta rêveberiya despotîk a li Rojhilata Navîn de kiriye û roleke diyarker lîstiye. Eger zemînek ji bo pêşvebirina Sûriyeyeke nû û demokratîk hatibe avakirin, ev yek bi saya têkoşîna ku ji aliyê gelê Kurd ve hatiye pêşxistine. Ne tenê li Sûriyeyê di heman demê de li Rojhilata Navîn di derketina pêşketineke bi vî rengî de jî xwedî parekê ye û pêşengiyê jê re dike. Eger rastiya Kurd neyê dîtin û mafê wan neyê naskirin ne Sûriye ne û jî Rojhilata Navîn pêkan nîne. Teqez wê cihê gelê Kurd li Sûriyê û Rojhilata Navîn hebe.
Bi van daxwaz û hestan em hemû gelên li Sûriyeyê pîroz dikin, bawer dikin ku wê hemû gel bi hev re Sûriyeyeke wekhev, demokratîk û azad ava bikin û em bang li her kesî dikin ku li ser vê bingehê tevbigerin.”