Rêveberiya Xweseriya Demokratîk a Kantona Firatê têkildarî êrişên dewleta tirk û komên wê yên paramîlîter ên SMO’yê yên li ser Kobanê û tevahiya herêma Bakur û Rojhilatê Sûriyeyê daxuyanî da. Daxuyanî, li Qada Jina Azad bi beşdariya rêveber û endamên saziyên rêveberiya xweser, partiyên siyasî û rêxistinên civakî hat dayîn.

 

Daxuyanî bi zimanê Kurdî ji aliyê Hevserokê Fakulteya Ziman û Wêjeya Kurdî ya Zanîngeha Kobanê Mamoste Egîn Nasiro ve hate xwendin. 

 

Egîn Nasiro diyar kir ku ew di her kêliyê de amade ne ku ji bo çareseriya mayinde ya hemû pirsgirêken Sûriyeyê bi rêya diyalogê kar bikin da ku hemû gelên li Sûriyeyê jiyan dikin bikarin bi awayekî azad û aram bi hevre bijîn. Bi domdarî hate gotin ku ew ji bo her cureyên çareseriyê amade ne. 

 

ÊRIŞÊN DEWLETA TIRK Û KOMÊN PARAMÎLÎTER

 

Di berdewamê de Nasiro bal kişand ser êrişên dawî û wiha got: “Di wan çend rojên dawiyê de erişen berfireh ên li ser axa Sûriyeyê, Bakur û Rojhilatê Sûriyeyê bênavber didomin. Bi taybetî li dijî gelê me yê li Şehba û Minbicê bi alîkariya dewleta Tirk a dagirker êrişên dijmirovî pêk hatin. Gelek jin, zarok û pîr hatin qetilkirin. Bê guman ev êriş li ber çavên hemû cihanê pêk hatin. Gelek dîmenên bi êş derketin pêş. Serjêkirin, şewitandina mirovan, îşkencekirin û her cure kiryarên dijmirovi pêk hatin. Li hemberî wan êrişên dermirovî, şervanên HSD, YPJ û meclisên leşkerî bersivên tund dan dagirkeran, berxwedanek bêhempa nîşan dan. Gelek şervanên me bi qehremanî şehîd bûn.” 

 

‘XEYALA TIRKIYEYÊ DAGIRKIRINA ROJAVA Û QIRKIRINA GELÊN HERÊMÊ YE’

 

Bi domdarî hate gotin ku dewleta tirk bi rêya balafiran û her cure teknîkê destê xwe li pişta komên paramîlîter xist û bi awayekî hovane berê wan dan ser gelên herêmê. Daxuyanî wiha domiya: “Li Şehba, Minbic, Eyn Îsa û gundewarên Kobanê komkujî çêkirin. Armanca dewleta Tirk a dagirker tunekirina gelên herêmê ye, dagirkirina rojavayê Kurdistnanê ye, ev xeyala dewleta Tirk a qirker e. Bi taybetî ne tehmulkirina dagirkeran a ji bo rêveberiya xweser, bi salane di rojeva dewleta Tirk a dagirkerde ye.”

 

‘GEFEKE MEZIN LI SER KOBANÊ HEYE’

 

Nasiro, bi bîr xist ku Şoreşa 19’ê Tîrmehê li Kobanê dest pê kir û wiha pê de çû: “Her wiha êrişa çeteyên DAIŞ’ê yên li ser Kobanê li vir hatin şikandin û vê yê ziravê Erdoganê faşîst qetand. Lewma di her gotinê de tehditên ser Kobanê di rojeva dagirkeran de ye. Kobanê bûye striya çavên wan. Di van kêliyan de gef û metirsiyeke mezin li ser Kobanê heye. Lê em dibêjin bila raya giştî zanibe ku çeteyên DAIŞ’ê li Kobanê bi destê şervanan hate tunekirin û mirovahiyê henase girt, lewma cîhan deyndarê şervan û gelê Kobanê ye. Dem dema xwedî derketina li Kobanê ye.

 

BANG

 

Em bang li gelê xwe û raya giştî ya demokrat, azadîxwaz, koalîsyona navnetewî û hemû mirovahiyê dikin ku werin em bi hevre rûmeta mirovahiyê li Kobanê biparêzin.”