NAVENDA NÛÇEYAN - Di êrişên sê rojan ên dewleta tirk û komên paramîlîter ên li dijî Bakur û Rojhilatê Sûriyeyê de 31 sivîl hatin qetilkirin û 9 jî birîndar bûn.
Koma Heyet Tehrîr El Şamê (HTŞ) di 27'ê Mijdarê de li dijî rejîma Baasê êriş da destpêkirin û êriş bi hilweşandina rejîmê biencam bû. Bi êrişa hemwext a HTŞ’ê re dewleta tirk û komên wê yên paramîlîter a SMO’yê jî êrişî Bakur û Rojhilatê Sûriyeyê kir. Êriş hêj didomin. Ajansa Nûçeyan a Hawarê (ANHA), bîlançoya êrişên dewleta tirk û koma wê ya paramîlîter ên sê rojan (8-9-10’ê Kanûnê) eşkere kir.
Li gorî nûçeya ANHA’yê; di encama êrişên van sê rojan de jin û zarok jî di nav de 31 sivîl hatin qetilkirin û 9 sivîl jî birîndar bûn. Her wiha 45 leşkerên rejîma Sûriyeyê dema vedigeriyan malên xwe di êrişên dewleta tirk de hatin kuştin û aqûbeta 15’an jî nayê zanîn.
SIVÎL Û XEBATKARÊN TENDURISTIYÊ HEDEF HATIN GIRTIN
* Dewleta Tirk û komên wê yên paramîlîter di 8’ê Kanûnê de li Kantona Firatê seyareya endamên Hêzên Ewlekariya Hundirîn kirin hedef. Di êrişê de 3 endamên Hêzên Ewlekariya Hundirîn ên bi navên Suhêl Bekê, Hesen Nesan û Mihemed Emîn Hemo jiyana xwe ji dest dan.
LI EYN ÎSAYÊ 2 KOMKUJÎ
* Di 8’ê Kanûnê de balafireke bêmirov a bi çek a dewleta Tirk li gundê Misterîha yê Eyn Îsayê bombebaran kir û komkujî pêk anî. Di êrişê de ji heman malbatê 6 jê zarok 12 kes hatin qetilkirin.
* Di 8’ê Kanûnê de dema leşkerên Sûriyeyî bi awayekî komî ji gundewarê rojavayê herêma Eyn Îsayê vedikişiyan ji hêla balafirên bêmirov ên dewleta Tirk ve li gundê Misterîhahê yê li rojavayê Eyn Îsayê hatin hedefgirtin. Di êrişê de 45 leşker hatin kuştin û 15 jî winda ne.
* Di 10'ê Kanûnê de jî gundê Ceda yê mezin ê li başûrê rojavayê Kobanê (Nêzî Pira Qereqozaqê) bombebaran kirin. Di êrişê de welatiyê bi navê Ebdullah Mehmûd Şêx Elî (25), Ebdullah Mehmûd Şêx Elî (12) û du zarokên din hatin qetilkirin. Di heman rojê de gundê Eftar ê li başûrê rojavayê Kobanê topbaran kirin û di êrişê de 2 zarokên bira Mezlûm û Yûsif Ebdulqadir Îsmaîl hatin qetilkirin.
* Di 10’ê Kanûnê balafireke bêmirov a dewleta tirk li ser rêya Bendava Tişrînê û bajarokê Sirînê ambulansa veguhestina birîndaran bombebaran kir. Di bombebaranê de welatiyê bi navê Kurdo Necdet Bozî û birîndareke din jiyana xwe ji dest dan û welatiyek û hemşîreyek jî bi giranî birîndar bûn.
* Di 10’ê Kanûnê de dewleta Tirk a bi balafira bêmirov a bi çek gundê Sifeya yê rojavayê bajarê Eyn Îsayê bombebaran kir. Di êrişê de jin û zarok jî di nav de 8 sivîl hatin qetilkirin. Navên kesên hatin qetilkirin wiha ne; ‘Xelîl Silêman, Wedah Silêman, Mihemed El Abo, Ebdulkerîm El Abo, Delal Silêman, Nadiya Silêman, tevî her du zarokan Casim û Husam Silêman.’
* Di 11'ê kanûnê de dewleta Tirk û komên wê yên paramîlîter Pira Qereqozaqê bombebaran kirin. Di encamê de jina bi navê Zahîre Kûsa (60) hate qetilkirin û neviyê wê yê 8 salî jî birîndar bû.
ÊRIŞÊN SER KANTONA CIZÎRÊ
* Di 11’ê Kanûnê de dewleta tirk komên wê yên paramîlîter gundê Til Cuma yê bajarê Til Temirê topbaran kirin. Di êrişê de welatiyek birîndar bû. Di heman rojê de jî gundê Hermel û Mihermele jî hat topbarankirin. Welatiyê bi navê Hesen Hesen hat qetilkirin û 2 welatî jî birîndar bûn.
* Dewleta tirk û komên wê yên paramîlîter li ser rêya di navbera Zirgan û Serêkaniyê de erebeyek bombebebaran kirin. Di êrişê de 3 welatî bi giranî birîndar bûn.