Êrişên dewleta tirk û komên wê yên paramîlîter ên SMO’yê yên ser Bakur û Rojhilatê Sûriyeyê didomin. Li dijî van êrişan, li ser sînorê Qamişlo-Nisêbînê çalakiya nobetê hatibû destpêkirin û di roja 4’an de didome. Duh jî şandeyeke ji Şirnexê hate serdana çalakiyê. Hevserokê DEM Partiyê yê Mêrdînê Mehmet Mehdî Tunç û Hevserokê DEM Partiyê yê Şirnexê Abdullah Gungen têkildarî êrişan û çalakiyên tên lidarxistin axivîn. 

 

'JI HER DEMÊ BÊHTIR XETERE LI SER KURDAN HEYE’ 

 

Tunç, diyar kir ku şerê li ser Kurdan ê li Bakur û Rojhilatê Sûriyeyê ev 13 sal in bênavber didome û wiha got: “Ji destpêkê ve şer bi destê dewletên kûrewî ve tê meşandin. Ji çar aliyên cîhanê çete kom kirine û tevî di lîsteya ‘terorê’ de cih digirin jî şer bi destê wan didomînin. Gelê Kurd li dijî van çeteyan tevekan li ber xwe dide. Lê ji her demê bêhtir xetere li ser gelê Kurd heye. Îktîdara heyî hemû cureyên alîkariyê didin van çeteyan da ku li dijî Kurdan şer bikin. Lê divê îktîdar fêm bike ku şerê li Qamişloyê dê bandorê li vir bike. Heke li wir aştî hebe jî dê bandorê li Enqereyê bike. Bi sala ye di navbera gelan de sînorên qirêjî xêz kirin. Bi lêkirina dîwaran nikarin xwişk-birayan ji hev qut bikin. Dê gelê Kurd zexta wan a koletiyê qebûl neke.” 

 

'GELÊ KURD JI BO AZADIYA XWE LI BER XWE DIDE’ 

 

 

Bi domdarî Tunç diyar kir ku gelê Kurd di şexsê Rojava de têkoşîna azadiyê dimeşîne û wiha dirêjî da axaftina xwe: “Divê ev êriş bên bidawîkirin. Divê hêzên navneteweyî bibînin ku Rojava, li Rojhilata Navîn mîna stêrkekê dibiriqe û rûmeta mirovahiyê diparêze. Rojava, modêla aştî, jiyaneke birûmet e. Divê vê rastiyê bibînin. Gelê Kurd li Rojava ji bo parastina xwe, çanda xwe, nasname, xak û hebûna xwe têdikoş e. Xaka Kurdistanê xakeke pîroz e û Kurd ji bo demokrasiyê têdikoşin. Azadî navê Kurdan û berxwedan jî paşnavê wan e. Heke li cihekî ferzkirina koletiyê hebe, li wir dê têkoşîna azadiyê hebe. Rojava ruh û dilê me ye. Ji bo Kurdan ferqa BRojava, Başûr, Rojhilat û Bakur nîne. Tevek yek parçe ne. Hebûna gelekî, li ser tunebûna gelekî nayê avakirin.” 

 

'DIVÊ LI SER KURDAN HESABÊN ŞAŞ NEKIN’ 

 

Tunç, destnîşan kir ku dê gelê Kurd di vê sedsalê de azad bibe û wiha derbirî: “Tevahiya gelên cîhanê heta astekî azad bûne. Ev sedsal jî dê bibe sedsala azadiya Kurdan. Bila ev îktîdar li kesên heta duh ji Kurdan re digotin ‘ecnebî’, yên nasname û mafên nedidan binêre bê ka niha li ku ne. Duh Sedam bû, îro Esad û sibe dê hin kesên din bin. Gelê Kurd dê ji têkoşîna azadiyê paşvegav neavêje. Bila li Amedê, Dêrsimê, Mahabadê, Şêx Seîd, Seyîd Riza binêrin. Lewma dê meşa gelê Kurd bidome. Muxatabê Kurdan birêz Abdullah Ocalan e û heta deriyên Îmraliyê venekin dê hesabên wan ên şaş ji Bexdayê, ji Şamê, ji deriyê Îmraliyê vegerin. Bila kesek li ser Kurdan hesabên şaş neke. Ji bilî berxwedan û azadiyê tu rêyên me nînin. Dewleta tirk jî an dê jiyaneke bi xwişk-biratî û naskirina Rêveberiya Xweser hilbijêre yan jî bi hevkariya çeteyan re aloziyê hilbijêre.” 

 

'TEHEMÛLA KURDAN NÎNE KU VÊ SEDSALÊ JÎ WINDA BIKIN’ 

 

Tunç, banga diyaloga bi Rêberê PKK’ê Abdullah Ocalan re li îktîdarê kir û wiha got: “Neçareserkirina pirsgirêka Kurd dê xêrê negihîne tu kesî. Nabe ku tu çeteyan bişînî ser birayên me û li rexa din qala aştiyê bikî. Em vî destê qirêjî nagirin. Heta ku êriş hebin dê nobet û têkoşîna me jî bidome. Banga me ji bo gelê me ev e; Rojava rûmeta me ye, pêşeroja me ye, sedsala me ya 21’emîn e û divê em bêhtir xwedî lê derkevin. Tehemûla Kurdan nîne sedsala 21’emîn winda bike. Em ê lîstikên qirêjî vala derxînin. Em ji her demê bêhtir xurt in û nêzî azadiyê ne. Dê gelê Kurd azad bibe û aloziya Rojhilata Navîn bi dawî bike.” 

 

'DÊ QEDERA GELÊ KURD DIYAR BIKE’

 

 

Hevserokê DEM Partiyê yê Şirnexê Abdullah Gungen jî destnîşan kir ku ew li dijî êrişan û ji bo parastina destkeftiyên Rojava li ser sînor in. Gungen, wiha dom kir: “Îktîdara AKP’ê bi destê çeteyan êrişî Kurdan dike. Sedema vê jî ew e ku statûya Kurdan naxwazin. Lewma êrişên qirkirinên ser Kurdan dikin. Gelê Kurd dê di sedsala 21’emîn de azad bibe. Lewma li ser sînorê Qamişlo-Nisêbînê dîwar çêkirin. Lê ji bo me ferq nake. Dilê me li wir e. Dê Rojava di vê sedsalê de qedera Kurdan diyar bike.” 

 

'DIVÊ GELÊ KURD PIŞTGIRIYÊ BIDE’

 

Gungen, axaftina xwe wiha qedand: “Divê gelê Kurd li dijî van êrişan bikeve nava tevgerê û li rex Rojava cih bigire. Em dixwazin serkeftinên gelê Kurd, destkeftiyên wan bên parastin. Her kesên xwedî wijdan, gelê Kurd, parastvanên mafên mirovan divê piştgiriyê bidin vê çalakiya me. Werin tev li çalakiyê bibin.”