Çalakiya nobedê ya li ser sînorê Qamişlo yê navçeya Nisêbîna Mêrdînê, li dijî êrîşên dewleta tirk û Artêşa Neteweyî ya Sûriyeyê (SMO) hatiye destpêkirin di roja xwe ya 6’emîn de berdewam dike. Nûnerên partiyên siyasî û welatiyên Sertê piştgirî dan çalakiya nobedê. Hevserokê Partiya Wekheviya Gelan û Demokrasiyê (DEM Partî) ya bajarê Sêrtê Eşref Tekîn û Hevserokê Partiya Herêmên Demokratîk (DBP) yê Sêrtê Mustafa Dayanan ku beşdarî çalakiyê bûn têkildarî êrîş û çalakiyê axivîn.

 

‘ROJAVA JI BO CÎHANÊ MODEL E’

 

Hevserokê DBP'ê yê Sêrtê Mustafa Dayanan diyar kir ku bi êrîşan dixwazin modela jiyana hevpar a li Rojava ji holê rakin. Dayanan anî ziman ku modela jiyana nû ya ku bi bedelên mezin hat avakirin dixwazin tune bikin û wiha got: "Rejîma Baasê zêdeyî 60 salan xirabiyên mezin gelên wê derê kir. Li dijî vê zilmê di 13 salên dawî de gelên Rojava û Sûriyeyê rabûn ser piyan li dijî zilmê şerê kirin. Sîstema ku li wir hat afirandin, di şexsê Rojava de rizgariya hemû cîhanê nîşanî me da. Divê mirov çawa xwe biparêze, ev yek ji hemû gelên cîhanê re bûye mînak. Ev şoreşa jinê ye. Ev pergala ku bi felsefeya birêz Abdullah Ocalan hat ava kirin, bi dirûşma 'Jin jiyan azadî' li hemû cîhanê deng veda. Rojava xwe weke model nîşanî hemû cîhanê da. Ev model li ser bingeha demokrasiyê û çawaniya parastina xwe ye. Ev yek ji hemû gelên cîhanê re bû mînak. Îro dewletên kurewî ji bo şikandin û tunekirina vê modelê bi rêya çeteyan êrîşan pêk tînin.”

 

'ÇARESERÎ BI VÊ MODELÊ PÊKAN E’

 

Dayanan anî ziman ku pêwîstiya gel bi aştî û azadiyê heye û diyar kir ku yekane rizgariya ku gelan ber bi aştî û azadiyê ve dibe modela Rojava ye û got, "Em dixwazin diyar bikin ku em her tim ji muzakere û aştiyê re amade ne. Bi lîstikên bênavber yên dagirkeran re rû bi rû man. Lê divê baş zanibin ku dê gelê kurd, gelên Rojava û Rojhilata Navîn bi ser bikevin. Em ê heta dawiyê li dijî vê ferasetê bisekinin. Em di wê baweriyê de ne model dê bibe rizgariya hemû mirovahiyê. Rizgariya gelan bi vê modelê pêkan e.”

 

‘REJÎM HILWEŞIYA DÎSA JÎ KURD HEDEF TÊN GIRTIN’ 

 

Hevserokê DEM Partiyê yê Sêrtê Eşref Tekîn da zanîn ku berevajî guhertina piştî hilweşandina rejîma BAAS'ê, Rojava dîsa bû hedefa êrîşan û wiha axivî: "Me her tim diyar kir ku divê ev êrîş rawestin. Aşkere ye ku hêzên navneteweyî hin biryar girtine û bi hin rêxistinên li Sûriyeyê re di nava têkiliyê de ne. Ev danûstandin dewam dikin, lê êrîş û gefên li ser Rojava bi dawî nebûne. Weke kurdên li Bakur em her tim di wê baweriyê de ne ku mafê gelên Rojava ye ku li ser axa xwe bijîn. Wisa tê fêmkirin ku ev wan aciz dike û ev nêzîkatiyeke ne rast e.”

 

‘FÊKIYA VÊ MODELÊ HAT XWARIN’

 

Tekîn diyar kir ku divê pirsgirêkên li Sûriyeyê bi rêyên aştiyane û bi diyalogê bên çareserkirin û wiha dewam kir: "Li Sûriye û Rojava bi têra xwe şer û mirin çêbûn. Ji îro û pê ve gelê Sûriyeyê divê li ser esasê jiyaneke wekhev jiyana xwe bidomîne. Divê bi zelalî bê gotin ku gelên Rojava ax, ziman, çand û dîrokê dixwazin. Jixwe li Rojava modelek heye û vê modelê ji xwe re esas bigirin. Gelê Rojava ev model beriya bi salan afirand. Fêkiya vê modelê hat xwarin."

 

Tekîn bal kişand ser bangên ji bo Rêberê PKK'ê Abdullah Ocalan tên kirin û diyar kir ku divê hikûmet van bangawaziyan di pratîkê de bi cih bîne û got, "Divê muzakere û nîqaş bên kirin. Em bangên 'were biaxive' li birêz Ocalan tên kirin girîng dibînin. Hikûmet plan û bername amade kiriye, lê divê mûxalefet jî bi cesaret rola xwe bilîze."

 

MA / Ahmet Kanbal