AMED - Komeleya Çand û Hunerê ya Dîcleyê li Amedê konserek li dar xist. Hunermandan bi stran û awazên kurdî eywan hejandin.
Komeleya Çand û Hunerê ya Dîcleyê ku li Amedê xebatên xwe yên çand û hunerî bi rê ve dibe, bi armanca “Hevnasîn û Piştevaniyê” konserek bêhempa li dar xist. Konser li Eywana Dawetê ya Ava ya li semta Dîclekentê yê ya navçeya Peyasê hat lidarxistin. Bi hezaran welatî beşdarî konserê bûn.
HUNERMENDAN EYWAN HEJANDIN
Di konserê de ewilî Orkestra MA Muzikê derket ser dikê. Pişt re jî hunermendê Komeleyê Ahmet Jiyara derket ser dikê û strî. Dû re stranbêjê komeleyê Rênçber Agirî derket ser dikê û stranên xwe gotin.
Hunermend Şîlan Dora derket ser dikê û ji bo zimanê kurdî û 8’ê Adarê peyam dan û stranên xwe pêşkêşî bîneran kir.
Bi derketina hunermend Azad Bedran a ser dikê re coşa li hêwanê zêdetir bû. Herî dawî Hunermend Hîvron derket ser dikê û stranên xwe yên ji hev xweştir gotin.
BANGA XWEDÎDERKETINA LI ÇAND Û ZIMANÊ KURDÎ
Di konserê de welatiyan bênavber li ber stranan govend gerand û coşa konserê hêjayî dîtinê bû. Hunermendên derketin ser dikê silavên xwe ji girtiyan re şandin û ji bo xwedîderketina li ziman, çand û hunera kurdî bang hat kirin. Konser bi gerandina govendê û bi berzkirina "Bijî berxwedana zindanan" bi dawî bû.