Muzîkjen ango piyanîstê ji Rûsya Evgeny Grînko ku klîbên wî li ser torên medya civakî ji aliyê bi milyonan kes ve hatine temaşekirin û ecibandin li Amedê derket ser dikê û konserek xweş pêşkêşî guhdarên xwe kir. Ji hezar kesî bêtir beşdarî konsera Grînko yê bi terza xwe ya ku muzîka klasîk û modern digihîne hev û li tevahiya cîhanê balê dikişîne ser xwe bû. 

 

Li gel metirsiya nexweşîna vîrûsa koronayê jî eywana konserê tije bû. Konserê nêzî 2 saetan dom kir û li gel piyanoyê gîtar û bateri jî lêdan. 

 

Grînko di konserê de berhemên wek “Dusty Room”, “Faulkner's Sleep”, “Graying” û berhema “Jane” ya hunermendê Îranî Mahmood Norî jî da guhdarkirin. Guhdaran herî zêde ji bo berhema “Valse” ya Grînko ku li ser medya civakî rekorê şikandiye li çepikan dan.