Hunermendên li dijî êrîşên Tirkiyeyê ya li ser Bakur û Rojhilatê Sûriyeyê kampanya îmzeyan a “Em şer rawestînin" dan destpêkirin gotin: "Huner cîhanê xweşik dike. Şer cîhanê qirêj dike" û xwestin her kes li dijî şer bêtir dengê xwe bilind bikin. Hunermendan anîn ziman ku ev dagirkerî ye.
Rojnameger û wênesaz Zehra Dogan li kolanên Londonê wêneyê Berxwedana Rojava xêz kir.
Derhênerê fîlmê "Gorulmuştur" Serhat Karaaslan, destnîşan kir ku welta veguheriye girtîgehekê û got, ji ber tirsa hatiye berbelavkirin mirov êdî naçin fîlman jî temaşe nakin.
Koma muzîkjenan Anadolu Quartet ku li Nisêbîn û Êlihê ji ber şer konsera xwe betal kir, li Amedê konser li dar xist. Di konserê de dengê awaz û stranên kurmancî, ermenkî û tirkî bilind bû.
Dengbêjan jî nerazîbûnên xwe yên ji bo êrîşên Tirkiyeyê yên li ser Rêveberiya Xwesr a Bakur û Rojhilatê Sûriyeyê anîn ziman û bang li hunermendan kirin ku li dijî şer dengê xwe bilind bikin.
Li Amedê 20 zarokên dezavantaj bi xêz û çîrokên xwe bi pirtûka “Mafên Zarokan” vegotin. Pirtûkê di refên pirtûkxaneyan de cihê xwe girt û dê di 20’ê cotmehê ji bo pirtûkê roja îmzeyan bê lidarxistin.
Li Heskîfê ku dê ji ber Bendava Ilisûyê di bin avê de bimîne, ji hêlekê ve xebatên ji bo veguhastina berhemên dîrokî tên kirin ji hêlekê jî rûxandin û xebatên arkeolojîk tên kirin.
Weşanxaneya Lîsê, portreya Kurdolog Prof. Dr. Celîlê Celîl "Jîyaneke Li Pey Zanyarîyên Kurdî" çap kir. Pirtûk ji aliyê Nîhat Gultekîn ve hatiye amadekirin û ji hevpeyvînên ku di 30 salên dawî de bi Celîlê Celîl re hatine çêkirin pêk tê.
Hunermend Mem Ararat li Amedê bi beşdariya sedan welatiyan konserek bêhempa li dar xist.
Hejmara 9’emîn a kovara derûnnasiyê “Psychology Kurdî” derket. Kovar di vê hejmarê de bi mijara “Jin û Derûniya Jinê” derketiye pêş û gelek mijarên cûrbicûr li kovarê hatine kirin.
Weqfa Mezopotamyayê panela “Xebatên Folklorê û Nasnameya Kurdî” li dar xist. Prof. Dr. Şukriye Resûl got, lazim e kurd di xeta kurdan de yekîtiya xwe ava bikin. Prof. Dr. Celîlê Celîl jî da zanîn ku li Sovyetê hemû xebatên ziman, çand û folklora kurdan bi awayek fermî dihat nasîn.
1’emîn Mîhrîcana Çand û Huherê ya Ciwanan a Mem û Zînê ya li Cizîrê, bi hinceta qedexeya Walîtiaya Şirnexê, hat taloqa kirin. Hevşaredarê Cizîrê Mehmet Zirîg, diyar kir ku ev dewama pêkanînên qeyûman e.
Hejmara yekemîn a kovara xêzeromana kurdî Zrîngê, li standên Fûara Pirtûkan a Amedê ye. Xwînerên kurdî eleqeyeke zêde nîşanî Zrîngê didin.
Nivîskar Helîm Yûsiv bi romaneke nû li pêşberî xwendevanên xwe ye. Romana bi navê "Firîna Bi Baskên Şikestî" ku qala Kobanê dike ji Weşanên Peywendê derket û yekem car li 7'emîn Fûara Pirtûkan a Amedê gihîşt ber destê xwîneran.
Şaredariya Pirsûsê, ji bo hinarên Pirsûsê bên naskirin û zêde bên hilberandin, wê "Mihrîcana Hinaran" li dar bixe. Hevşaredar Hatîce Çevîk, bilêv kir ku ji bo belgeya tescîlê ya erdnîgarî ya hinaran wergbigirin tev digerin.