5’emîn Dadgeha Cezayên Giran a Amedê beriya hilbijartinê mafên memnu yên Hevşaredarê Bajarê Mezin ê Amedê Abdullah Zeydan îade kiribû û ev biryar ji hêla Dadgeha Bilind ve hate betalkirin. Dadgeha Bilind, dosya ji 5’emîn Dadgeha Cezayên Giran a Amedê re şand û xwest piştî lêkolînên pêwîst dîsa biryarê bide.  

 

Hevşaredarên Bajarê Mezin ên Wanê Neslîhan Şedal û Abdullah Zeydan têkildarî biryara Dadgeha Bilind û pêvajoya piştre de ji Ajansa Mezopotamyayê (MA) re axivîn. 

 

‘DEV JI VÊ HEWLDANA NEHIQÛQÎ BERDIN’

 

Zeydan, diyar kir ku biryar beriya teblîxî wan were kirin ji hêla medyaya alîgir ve hatiye weşandin û ev yek derhiqûqî ye. Zeydan, wiha got: “Ev yek nîşan dide ku biryareke siyasî ye û mekanîzmaya edaletê nehatiye bikaranîn. Dadgehê biryara îadekirina mafên memnû daye û ev biryar teqez bûye. Lê ji bo hilbijartinê 2 roj mabûn ku biryareke nû hate dayin û ev biryar ji holê rakir. Dadgehê, kompas danî ber kesekê dikeve hilbijartinê. Hem weke dadgehê dê biryarek were dayin hem jî biryareke teqez heye. Me jî bi baweriya ji vê biryarê serî li YSK’ê da. Biryarê dide ku tu ji bo namzetiyê tu astengî nînin. Gelê me jî xwedî li partiya xwe derket û her 14 şaredarî bi dest xist. Lê tehemûla vê serkeftinê nekirin. Bi destê hiqûq û edaletê kompas çêkirin û hewl dan mafê bijartin û hilbijartinê yê gel xesp bikin. Dema dixwestin mazbatayê xesp bikin, gel xwedî li îradeya xwe derket û berxwedaneke birûmet raber kir. Daxwaza me ew e ku hikûmet û daraz dev ji van hewldanên nehiqûqî berde û rêzê ji vîna gel re bigire.” 

 

'XEFIKÊ LI BER XELKÊ WANÊ DANIN’ 

 

Bi domdarî Zeydan anî ziman ku li şûna rêzê ji hiqûqê re bigirin, îktîdar serî li rêbazên cuda dide û wiha pê de çû: “Hêj jî hewl didin bi xefikan îradeya xelkê Wanê xesp bikin. Dixwazin mazbatayê bidin hin kesên din. Em vê bi tu awayî qebûl nakin. Heke îdiaya wan ew be ku li gorî hiqûq û edaletê biryarê didin, wê demê bila li biryara 3’yemîn Daîreya Cezayan a Dadgeha Bilind a têkildarî îadekirina mafên memnu binêrin. Di wan biryaran de dibêje ku her çend biryara îadekirina mafên memnu ji holê hatibe rakirin jî nabe ku ev yek li dijî bersûc bê bikaranîn. Ji ber ku xemsariyeke ji ber bersûc qewimî nîne, ji ber dadgehê dewletê qewimî ye.” 

 

'EM Ê BERTEKA XWE YA DEMOKRATÎK NÎŞAN BIDIN’ 

 

Di berdewamê de Zeydan bi lêv kir ku gel heta niha îradeya xwe parastiye û wiha dirêjî da axaftina xwe: “Dê ji niha û pê ve jî biparêze. Ji ber ku yek ji hêmayên herî girîng a demokrasiyan, îradeya gel û hilbijartin in. Em ê heta dawiyê vîna gelê Wanê biparêzin û vê bêhiqûqtiyê qebûl nekin. Em ê nehêlin mazbataya gelê Wanê bidin hin kesên din. Tevî gel em ê heta dawiyê berteka xwe ya demokratîk nîşan bidin. Hêvîdarim dadgeha herêmî dê biryara xwe li leha bersûc bide. Nexwe dê bibe biryareke skandal. DMME’yê jî têkildarî biryara derheqê min de biryara binpêkirinê da. Me biryara DMME’yê pêşkeşî AYM û Dadgeha Bilind kir lê paşguh kirin. Anku di esasê xwe de ev biryara girtinê biryareke ne li holê ye. Li gorî Xala 90’emîn a AYM’ê, biryarên DMME’yê diyarker in. Lê ev bêhiqûqtî didome. Eleqeya pêvajoyê bi hiqûq û edaletê re nîne.” 

 

'AKP HEWL DIDE MAZBATAYÊ BIDE NAMZETÊ XWE’ 

 

Zeydan, anî ziman ku ev biryar hewldana xespkirina îradeya xelkê Wanê ye û wiha got: “Diziyên qeyûman di 8 salan de kirin li holê ne. Xizmetên me yên 8 mehan jî li pêş çav in. Me derfetên xwe yên kêm pêşkeşî gel kirin û xizmetên ev 8 sal in nehatine kirin, ji bo gel kirin. Dixwazin dîsa şaredariyên gel talan û wêran bikin. Em ê destûrê nedin vê zîhniyeta xespkar. Bi taybet jî em dibihîsin k AKP hewl dide mazbatayê dîsa bide namzetê xwe. Îşala careke din êrişî vîna gel nekin. Ji ber ku xelkê Wanê bi berxwedanên 2-3’yê nîsanê nîşan da ku dê qebûl neke. Dê vê bêrûmetiyê qebûl neke. Îşala bi aqilane tevbigerin û nekevin nava hewldana xespkirinê. Me soz daye ku dê rûmet û heysiyeta gel heta dawiyê biparêzin. Dê wisa bi hêsanî nekarin çavkaniyên gel xesp bikin, bidizin û talan bkin. Em ê heta dawiyê îradeya gel biparêzin.”

 

'AKP DIKARE SERÎ LI HER CUREYÊN BÊHIQÛQTIYAN BIDE’ 

 

Hevşaredar Neslîhan Şedal jî got ku îktîdara AKP’ê mîna 22 salan dikare serî li her cureyên bêhiqûqtiyan bide û wiha domand: “Dema mijara behsa xeberê bû mafê bijartin û hilbijartinê yê kurdan, êrişên cuda tên kirin. Me jî ji medyaya alîgir mesele bihîst. Ev yek nîşan dide bê ka biryar çawa hatiye dayin. Biryara 3’yemîn Daîreya Cezayan a Dadgeha Bilind, nîşan dide bê ka pêvajoyeke çiqasî derhiqûqî ye. AKP qels dibe û mînaka vê ya herî şênber jî tayînkirina qeyûman e. Li Wanê tu şaredarî bi dest nexist. Lê AKP’ê du roj beriya hilbijartinê çav berda Wanê û xwest xesp bike. Lê gel bi berteka xwe ya demokratîk rê neda.”

 

'ÊRIŞEKE LI DIJÎ PARADÎGMAYA ME YE’

 

Şedal, destnîşan kir ku armanca esasî ya êrişê hedefgirtina paradîgmaya wan a demokratîk, ekolojîk û azadîxwaziya jinê ye. Şedal, got ku AKP ev 3 serdemin rejîma qeyûm veguherandiye weke şêweyekê rêvebirinê û wiha derbirî: “Tu xêra vê rejîmê ji bo kesekî nîne. AKP a ku bi hestên olî yên gel dilîze û heta vê rojê hat, niha bêwijdanî û bêexlaqiya herî mezin dike. Di şaredariyên Esenyurt, Mêrdîn, Êlihê de me ev dît. Derbe li jiyana gel, bawerî û derdorên cuda dike. Sepana qeyûm, derbeyeke li dijî pêkvejiyanê ye.” 

 

'DÊ WISA BI HÊSANÎ NEKARIN ÎRADEYA GEL XESP BIKIN’ 

 

Neslîhan Şedal, axaftina xwe wiha qedand: “Îktîdara AKP’ê li şûna çareserkirina pirsgirêkên gel, bi rejîma qeyûm re hemû çavkaniyên gel pêşkeşî alîgirên xwe dike. Me ev rûyê wan ê qirêjî teşhîr kir. Tevî vê jî siyaseta xwe ya talan, xespê didomînin. Me soz daye gelê xwe û dê xwedî li maf û keda wan derkevin. Dê wisa bi hêsanî nekarin îradeya gel xesp bikin, destên xwe bihêjînin û li wan kursiyan rûnin. Em ê heta dawiyê xwedî li destkeftiyên xwe derkevin. Xelkê Wanê xelkekî welatparêz e, berxwedêr û kedkar e. Dê xwedî li vîna xwe derkeve. Em careke din bang li gelê Wanê dikin ku xwedî li îradeya xwe derkeve û rê nede van talanker û çeteyan.” 

 

MA / Adnan Bîlen - Rûken Polat