Şerê navxweyî ku 13 sal in li Sûriyeyê dewam dike, bi hilweşîna rêveberiya Esad derbasî qonaxeke nû bû. Niha çawaniya pêkhatina Sûriyeya tê nîqaşkirin, gavên ku kurdên Bakur û Rojhilatê Sûriyê biavêjin tên meraqkirin. Daxuyaniya Fermandarê Giştî yê Hêzên Sûriyeya Demokratîk (QSD) Mazlûm Ebdî, duh êvarê li ser ekrana Ronahî TV ya têkildarî hevdîtinên muhtemel ên bi Şamê re û şandeyên ku dê bên avakirin balkişand. Girêdayî nîqaşên dawî bersiva pirsên; “Dê heyet kengî biçin Şamê? Di nava vê heyetê de kî cih digire? Kurd dê bi yek şandeyê beşdar bibin?” tên meraqkirin.

 

Hevserokê PYD’ê Xerîb Hiso têkildarî hevdîtina ku li Şamê bê kirin û amadekariya hevdîtinan ji Ajansa Mezopotamya (MA) me re axivî. 

 

AMADEKARIYA HEVDÎTINAN

 

Xerîb Hiso da zanîn ku li Sûriyeyê kaos û tevlivevî didome û wiha axivî: “Ji ber kaosê fikarên hemû kesî hene. HTŞ’ê rejîmek ava kiriye û paytexta Sûriyeyê kontrol dike. Hêzên navneteweyî piştgiriyê didin HTŞ’ê. Em jî bi giranî dixebitin û civînan li dar dixin. Em amadekariyên civîna li Şamê pêk were, dikin. Heya niha tevlêbûna navneteweyî tune ye. Di pratîkê de tiştek tune û niha tenê ala navendî heye. Rejîmek çû, rejîmek din hat. Rejîma berê neteweperest bû. Ev rejîma nû hem netewperest û hem jî Îslamî ye. Em jî li dijî vê yekê ne û sîstema me sîstemeke demokratîk e. Heyet wê di demeke nêz de bicivin û hevdîtinê pêk bînin. Fermandarê Giştî yê QSD'ê Mazlûm Ebdî jî got, ‘Em hin hevdîtinên leşkerî dikin’, lê behsa hevdîtinên siyasî nekir. Heyet wê biçin Şamê. Piştî hevdîtinan dikare nirxandinên berfirehtir bêne kirin.”

 

BILA ENKS JÎ BEŞDAR BIBE

 

Xerîb Hiso anî ziman ku divê kurd li Sûriyeyê rûpelek nû vekin û got, “Berê gelek tişt qewimîn û bi dawî bû û divê em pêvajoyek nû bidin destpêkirin. Di navbera 10 roj berê û niha de ferqek mezin heye. Divê em wek kurd biçin Şamê. Ger em parçe bibin, em winda dikin. Divê em her tiştî li aliyekê bihêlin û li pêşiya xwe binêrin. Divê nêrînên me bibin yek û li ser navê kurdayetiyê tevbigerin. Berjewendiya me divê berjewendiyên kurdan be. Heyet dê biçin, lê ne diyar e kengê biçin. PYD piştgiriya beşdarbûna hemû kurdan di hevdîtinan de dike. Em dixwazin bi hev re heyeteke hevpar ava bikin. Ger em vê pêk neynin, em nikarin destkeftiyên xwe biparêzin. PYD û partiyên din jî dê di şandê de bin. Divê ENKS jî were û beşdar bibe. Bi gavên pratîkî tê afirandin. Berdewamkirina nakokiyên berê kêrî tu kesî nayê. Sedsalek me tune ku em winda bikin. Ger em bibin yek, ew jî neçar in vîna me qebûl bikin.”

 

‘DIVÊ SÛRIYEYEKE DEMOKRATÎK BE’

 

Xerîb Hiso bi bîrxist ku li Bakur û Rojhilatê Sûriyeyê rêveberiyeke demokratîk heye û wiha axivî: “Li vir pergalek ku mirov bi hev re dijîn heye. Pêwîste ev yek ji bo tevahiya Sûriyeyê pêk were. Ev sîstema demokratîk siberoja Sûriyeyê ye. Şam di navenda vê de ye. Sîstema me li Sûriyeyê pergala herî maqûl e. Bajarên ku herî zêde tê jiyîn bajarên me ne. Hevalên ku li her derê Kurdistanê dijîn bila piştgiriya me bikin. Em Sûriyeyeke demokratîk dixwazin ku her kes bi hev re bijî. Gelê me yê Bakur piştgirîyeke mezin da berxwedana Kobanê. Lehengiyeke mezin pêk hat. Kurdên li Bakur dîsa dikarin vê rolê bilîzin.”

 

MA / Emrullah Acar