Li dijî êrişên dewleta tirk û komên wê yên paramîlîter ên SMO’yê yên li dijî Bakur û Rojhilatê Sûriyeyê, bi pêşengtiya DEM Partî, DBP û TJA’yê di 13’ê Kanûnê de li ser sînorê Qamişlo-Nisêbîn a Mêrdînê çalakiya nobetê hate destpêkirin. Nobet, di roja 4’an de didome. Welatiyên tev li çalakiyê bûn, xwestin ku êrişên ser Bakur û Rojhilatê Sûriyeyê bên sekinandin. 

 

'EM DIXWAZIN AZAD BIJÎN’

 

Ji welatiyan Ramazan Tugrul anî ziman ku divê êriş bên sekinandin û wiha got: “Mîna hemû gelan, divê Kurd jî xwedî mafên gerdûnî bin. Me çavên xwe li vê xakê vekirin û dê li vê xakê bigirin. Êdî bes e. Banga me ji bo hemû welatên cîhanê ye; êdî bila ev xwîn bisekine û dawî li vê barbariyê bînin. Kurd, dixwazin li ser xaka xwe azad bijîn. Çavên me li destkeftiyên tu gelan nîne. Tenê dixwazin weke mirovan bijîn.” 

 

Dayika Aştiyê Sidika Erdem a ji Şirnexê beşdarî çalakiyê bûye jî ev tişt anî ziman: “Em ji bo piştevaniya bi gelê Rojava re hatin vê erê. Bi sala ye DAIŞ û piştevanên wan bi hovane êrişî Rojava dikin. Ên li wî alî jî zarokên me, dayikên me û gelên me ne. Li pêş çavên dinyayê tên qetilkirin. Wan destên xwe yên qirêjî li ser me bikişînin. Ev dinya bi têrî me tevan dike. Em jî li vê dinyayê dijîn divê êdî vê fêm bikin.” 

 

'GEF LI SER ROJAVA HEYE’

 

Ji Dayikên Aştiyê Hatîce Durmuş jî ji navçeya Cizîrê ya Şirnexê hatiye cihê nobetê û li dijî êrişan banga piştevaniya bi Bakur û Rojhilatê Sûriyeyê re kir. Hatîce Durmuş, wiha domand: “Her kes dikare ji bo piştevaniyê were vê derê. Em dixwazin tecrîda li ser birêz Abdullah Ocalan were rakirin. Em dixwazin rûnin ser maseyê û vê pirsgirêkê bi rêyên aştiyane çareser bikin. Em naxwazin ne gerîla ne jî sivîl, leşker û polîs bimirin. Di her mirinê de zirar digihije dayikan.”

 

Haşîm Dolek jî got ku bi êrişan re tê xwestin ku pêkvejiyana li Bakur û Rojhilatê  Sûriyeyê were tunekirin û wiha dirêjî da axaftina xwe: “Serkêşiya van polîtîkayên qirêjî jî AKP-MHP dikin. Gelê me yê li wir destê aştiyê dirêj dike û pergaleke li ser bingeha pêkvejiyanê ava dike. Lê destûrê nadin. Li Minbicê agirbestek hate kirin lê çeteyên paramîlîter ên weke SMO û hwd. binpê dikin. Tevahiya Rojava di bin xetereyê de ye. Em naxwazin heman rewşa 2014-2015’an a li Kobanê bijîn. Lê heke rewşekî wisa çêbibe jî em ê heta dawiyê têbikoşin.” 

 

Dolek, banga “Bi ruhê seferberiyê em xwedî li Rojava derkevin” li her kesî kir û axaftina xwe wiha qedand: “Rojava, rûmeta me ye. Rojava ne tenê rûmeta gelê kurd lê rûmeta hemû mirovahiyê ye. Rojava, gula lotusê ya hemû mirovahiyê ye. Bêguman em ê ji têkoşînê paşvegav neavêjin. Qamişlo, Nisêbîn e. Kobanê, Pirsûs e. Em dixwazin polîtîkayên qirêjî yên li dijî gelê me yê Rojava bên bidawîkirin. Em dixwazin ev êrişên dermirovî bên bidawîkirin. Bila van polîtîkayên qirêjî bi dawî bikin û destê aştiyê dirêj bikin.” 

 

MA / Ahmet Kanbal