Êrişên dewleta tirk û komên wê paramîlîter ên bi navê SMO yên girêdayî wê li ser Bakur û Rojhilatê Sûriyeyê didomin. Di vê çarçoveyê de rojnameger Nazim Daştan û Cîhan Bîlgîn ên êrişên li ser Qerekozaq û Bendava Tişrînê dişopandin, di 19’ê Kanûnê de li ser rêya di navbera Bendava Tişrîn û Bajarokê Sirrînê de ji aliyê Balafirên Bêmirov ên Çekdar ên Tirk (SÎHA) ve hatibûn qetilkirin.

 

Qetilkirina Nazim Daştan û Cîhan Bîlgînê li gelek bajaran hat protestokirin. Di çarçoveya van çalakiyan de 7 jê rojnameger 9 kesên ku di 21'ê Kanûnê de li Stenbolê di dema daxuyaniyê de hatin girtin.

 

HevserokaPartiya Wekhevî û Demokrasiyê ya Gelan (DEM Partî) ya Stenbolê Gonca Yangoz, Hevberdevkê Kongreya Demokratîk a Gelan (HDK) ya Stenbolê Alî Bal û Hevberdevka Partiya Herêmên Demokratîk (DBP) ya Marmarayê Çîçek Ariç li ser zextên li ser çapemeniyê qetilkirina rojnamegeran axivîn.

 

Gonca Yangozê diyar kir ku qetlîam dê xebatkarên Çapemeniya Azad netepisîne û da zanîn ku Bîlgîn û Daştan rûyê rast yê polîtîkayên şerê taybet ên desthilatê yên li Bakur û Rojhilatê Sûriyeyê ji cîhanê re eşkere kirine. Gonca Yangozê got: “Di rewşên wiha de partiyên siyasî û rêxistinên sivîl ên ku dixwazin xwe bigihînin nûçeyên rast, bi têkoşîna hevpar li dijî êrişan derdikevin. Tişta ku herî zêde jê ditirsin bi berfirehkirina xeta têkoşîna hevpar a li dijî komkujiya gelan bilindkirina dengê me yê hevpar e. Siyasetmedar û rojnamegerên ku dibêjin 'ev pênûs wê nekeve erdê' jî binçav dikin. Kuştina rojnamegeran polîtîkaya çavtirsandina Çapemeniya Azad e. Desthilat bi polîtîkayên xwe yên çewisandinê dixwaze atmosfera tirsê ava bike. Divê zincîrên tirsê bên şikandin. Tişta ku îro bi serê van rojnamevanan de hat, ne garantî ye ku wê sibe neyê serê rojnamegerên din jî. Lewma divê tu kes li hemberî qetilkirina Nazim û Cîhan bêdeng nemîne."

 

Çîçek Ariçê diyar kir ku wan geşedanên li Bakur û Rojhilatê Sûriyeyê ji rojnamevan Nazim Daştan û Cîhan Bîlgînê wergirtine û diyar kir ku di şer û pevçûnên li Rojhilata Navînê de gelek rojnameger jiyana xwe ji dest dane. Çîçek Ariçê got: “Wan bi xwe jî diyar kirin ku bûne hedef. Di demekê de ku li dijî kurdan propagandaya reş dihat kirin, 2 rojnameger bi hinceta ku agahiyên rast ji raya giştî re dane, bûn hedef. Min li ser vê bûyerê di çapemeniya tirk de zêde tiştek nebihîstiye. Du hevpîşeyên wan hatin kuştin. Kesî nexist rojevê. Jixwe ev kes rojnameger bûn. Li ser navê çapemeniyê li wir bûn. Ger îro welatek rojnamegerên xwe neparêze, navê vê rizaîbûn e. Heke kesek mîna min nafikire, gelo ev tê wê wateyê ku ew mirinê heq dike?"

 

‘DIVÊ RAYA GIŞTÎ GUH BIDE DAYIKA CÎHAN BÎLGÎNÊ'

 

Çîçek Ariçê da zanîn ku binçavkirina rojnamegerên li hemberî qetilkirina rojnamegeran û bi zext û tundiyê û girtina 9 rojnamegeran nayê qebûlkirin û got: “Zextên li ser rojnamegeran tên kirin, asta ku azadiya çapemenî û îfadeyê li Tirkiyeyê gihaştiyê derdixe holê. Rojnameger Ozlem Gurses ji ber ku got, 'Avaniya DAIŞ'ê, yanî pêkhateya TSK-SMO'yê li herêmên ku kurd lê hene, destkeftiyên biçûk bi dest xistine' hat girtin. Ji bo rexneyek herî biçûk jî rojnamegeran binçav dikin. Divê hemû li hemberî vê qiyamet bê rakirin. Em jî heman tiştî dibêjin. Lê li hemberî mirina du kesan ev qas bêdengî nayê qebûlkirin. Daxuyaniya dayika Cîhanê hebû. Cîhan jineke bi hêz e ku xwendiye û xwe bi pêş xistiye û gotiye ku ew li vir her karî dikare bike. Lê wê ya dijwar hilbijart. Li gorî min divê raya giştî guh bide dayikê."

 

‘RAYA GIŞTÎ BÊDENG E'

 

Alî Bal diyar kir ku di rejîmên zordest de ji bo agahiyên rast bigihêjin raya giştî di serî de rojnameger tên hedefgirtin û bi bîr xist ku Kobanê jî ev demeke dirêj e hedef tê girtin. Bal got: “Tirkiye bi hinceta ewlehiya sînor êrişî herêmên Rojavayê û Kobanê dike. Têkoşîna kurdan a ji bo daxwaza mafên xwe dewam dike. Di van demên dawî de bi taybetî di êrişên hewayî de bi dehan sivîl hatin qetilkirin. Rojnamegeran sivîlên hatin qetilkirin ji raya giştî ya Tirkiye û cîhanê re ragihandin. Bi daxuyaniya dawî ya Devlet Bahçelî re feraseta ku wê li welêt pêvajoyeke nû dest pê bike çêbû. Lê em bi pêkanînên tam berevajî re rû bi rû ne. Hat gotin ku dê bi birêz Ocalan re hevdîtin bên kirin. Berevajî vê, rewş diqewime. Li hemberî rojnamegerên hatin qetilkirin di raya giştî ya cîhanê de bêdengiyek heye. Sedema bingehîn a ku ev bertek pêş neket, têkiliyên bazirganî yên Tirkiyeyê yên bi Ewropa û welatên din ên emperyal re ye. Ji aliyê raya giştî ya Tirkiyeyê ve têra xwe bertek nîne. Bêdengiya derdorên îslamî û rojnamegerên li Tirkiyeyê bi taybetî yên ku der barê Filistînê de hesas in li hember vê mijarê nayê qebûlkirin."