MÊRDÎN - Êrişên li ser Bakur û Rojhilatê Sûriyeyê li ser sînorê Nisêbîn-Qamişloyê bi girtina nobedê tê şermezarkirin. Di nobeta îro de wiha hat gotin: " Muxatabê aştiyê diyar e. Tişta ku îro li Rojhilata Navîn diqewime ji bo hemû gelan firsendeke mezin e."
Çalakiya nobetê ya li dijî êrişên dewleta tirk û koma wê ya paramîlîter a SMO’yê yên li ser Bakur û Rojhilatê Sûriyeyê li ser sînorê Nisêbîn-Qamişloyê hatiye destpêkirin di roja 15’an de didome. Nobet bi pêşengiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) tê meşandin. Nobet li gel baranê didome.
Çalakvan pêşmalkên “Bijî berxwedana Rojava”, “Rojava rûmeta me ye” û “Na ji şer re” li xwe kirin. Beşdaran dirûşmên “Bijî berxwedana Rojava" û "Rojava rûmeta me ye” berz kirin. Nobeta ku 15 roj in didome de daxuyanî hat dayîn.
Dayika Aştiyê Halîme Kaya di daxuyaniyê de axivî û got: “Bila ev şerê qirêj bi dawî bibe. Rojava heta niha neketiye nava axa Tirkiyê, tenê xwe diparêzin. Em ji her kesî re aştiyê dixwazin. Bila şer bi dawî bibe û aştî pêk were. Ma ew ji xwîn û mirin têr nebûne? Em ji vir berxwedana Rojava silav dikin."
15 ROJ IN LI BER XWE DIDIN
Piştre Hevserokê Rêxistina DEM Partiyê yê Mêrdînê Mehdî Tunç axivî û diyar kir ku divê bi baldarî li dîrokê bê mêzekirin û wiha bi lêv kir: “Divê dost û dijminên Kurdan baş bên dîtin. Di dîrokê de her kesî navek li van axan li xwe kiriye, lê navê wê Kurdistan e. Em careke din li dîrokê binerin, Îskenderê Mekedonî ax dagir kir, lê Kurdan dîsa jî ji bilî jiyana azad tiştekî qebûl nekir. Welatê agir û rojê Kurdistan e. Ji ber vê yekê ya ku îro li Rojava diqewime ji bo mirovahiyê ya herî xerab e. Li Rojava di sedsala 21'ê de jiyana demokratîk tê jiyîn û ji bilî azadî û aştiyê ti jiyanek li wir nîne. Em banga xwe dubare dikin, 15 roj in em li vir in. Divê hikûmet tiştên qewimîne bi baldarî binirxîne û li ber çavan bigire.
KURD WÊ BI SER BIKEVIN
Muxatabê aştiyê diyar e. Di şexsê birêz Abdullah Ocalan de banga aştiyê li tevahiya Rojhilata Navîn hate kirin. Tişta ku îro li Rojhilata Navîn diqewime ji bo hemû gelan derfeteke mezin e. Ev hikûmet biratiya gelan binpê dike. Tişta ku li Rojava diqewime ji bo pêşeroja vî gelî ne baş e. Kurd di dîrokê de her tim alîgirê biratiyê bûne. Kurd îro dixwazin bi hemû gelên li van xakan re di nava aştiyê de bijîn. Mafên Kurdan mafên mirovahî, aştî û azadiyê ne. Di dîroka kurdan de koletî tune ye û koletî qet nehatiye qebûlkirin. Bedelên mezin hatin dayîn. Muxatabê çareseriyê zelal e. Em ê bi nasname û çanda xwe bijîn. Yên bi ser ketin wê kurd bin."