Rêberê PKK’ê Abdullah Ocalan ku li Girtîgeha Tîpa F a bi Ewlekariya Bilind a Îmraliyê tê ragirtin, di bin tecrîdeke giran de ye. Abdullah Ocalan ku 4 sal bûn tu agahî jê nedihatin girtin, di 23’yê Cotmehê de bi biraziyê xwe Parlamenterê DEM Partiyê yê Rihayê Omer Ocalan re hevdîtin kir. Di hevdîtinê de diyar kiribû ku tecrîda heyî didome. Piştî van geşedanan, Wezareta Dadê destûr da ku şandeya DEM Partiyê ku ji parlamenter Pervîn Buldan û Sirri Sureyya Onder pêk dihat, di 28’ê Kanûnê de li Girtîgeha Girava Îmraliyê bi Abdullah Ocalan re hevdîtin kirin. 

 

Lêbelê ji bo şikandina tecrîdê û azadiya fîzîkî ya Abdullah Ocalan heta niha jî tu gavên şenber nehatine avêtin. Ji bo şikandina tecrîdê di asta navxweyî û navneteweyî de çalakiyên hatine destpêkirin didomin. Nobeta li Wargeha Penaberan a Mexmurê bi daxwaza şikandina tecrîdê û azadiya fizîkî ya Rêberê PKK'ê Abdullah Ocalan hatie destpêkirin, salek û nîve didome. 

 

'DIVÊ KU EM BI RUHÊ CIWANTIYÊ LI DIJÎ TECRÎDÊ BISEKININ'

 

Ji ciwanan Yasemîn Îşlek diyar kir ku ji bo şikandina tecrîda li ser Rêberê PKK'ê Abdullah Ocalan divê ku têkoşîn bê mezinkirin û wiha axivî: “Weke ku tê zanîn ev 45 meh in ku li ser Rêber Apo tecrîdeke giran tê meşandin. Piştî 45 mehan me dît ku cezayê disiplînê li Rêber Apo re birine. Ji bo şikandina tecrîda li ser Rêber Apo me çalakiya nobetê da destpêkirin. Em vê tecrîdê qebûl nakin û çalakiyên ku ji bo azadiya Rêber Apo hatine destpêkirin em didin diyar kirin ku dê nikaribin îradeya gelê Kurd bişkînin û nikarin gelê Kurd ji vê dozê bidin paş. Ev saleke zêdetire ku me ev çalakiye daye destpêkirin. Em weke xwendekarên Rêber Apo û weke jinên ciwan me ev çalakiye dewr girt. Bi vê minesebetê em ê bi fikra Rêbertiyê ku jina azad daye afirandin bimeşîn û vê fikrê xurtir bikin. Weke jinên ciwan divê ku em vê çalakiyê heta ku encam digirin bidin meşandin. Rêbertî bi xwe jî dibêje,'me bi ciwanî dest pê kir û em ê bi ciwanî bi ser bikevin.' Divê ku em jî bi vî ruhî tevbigerin. Ew ruhê ku ji bo ciwanan hatiye bexşandin divê ku em xwedî li wî ruhî derbikevin û em bi tekoşîna ku li Îmraliyê tê dayin re bikin yek û hin zêdetir çalakiyên xwe xurtir bikin. Em bang li hemû jin û ciwanan dikin ku li hemberî tecrîdê bêdeng nemînin têkoşîna xwe xurtir bikin. Bi xwendina Rêbertî re em dikarin xwe bi têkoşîna wî re bikin yek. Bi dirûşma 'jin jiyan azadî' em dikarin hin bêtir têkoşîna xwe mezintir bikin."

 

'JI BO ŞIKANDINA TECRÎDÊ BÊTIRÎN TÊKOŞÎN PÊWÎSTE'

 

Ji ciwanan Ozlem Nêrwehî jî bi lêv kir ku ji bo şikandina tecrîdê divê ku herî zêde jin têbikoşin û ev tişt got: “Ev 26 sale ku Rêber Apo di girtîgehê de ye. Ev 45 meh in jî tecrîdeke giran li ser tê meşandin. Bi vê re jî bisînor neman û cezayê disiplînê jê re birin. Ji bo şikandina vê tecrîdê û azadiya fizîkî ya Rêber Apo çi dikeve ser milê divê ku em bikin. Em jî weke jinên ciwan tev li çalakiya nobetê bûne. Banga me ji jinên ciwan re ew e ku tevlî vê çalakiya me bibin û kar û xebatên xwe ji bo vê zêdetir bikin." 

'ÇI BIKEVE SER MILÊ ME EM AMADE NE'

 

Ji jinên ciwan Pinar Bayar jî got ku heta ku azadiya fîzîkî ya Abdullah Ocalan pêk tê ciwan dê di çalakiyan de bin û axaftina xwe wiha qedand: “Armanca tecrîdê ew e ku ji hêla fîzîkî de jî Rêber Apo têk bibin. Bi tecrîdê dixwazin ku fikir û ramanê Serokatî tune bikin. Ev çend sale ku em agahî nastînin û tecrîdê her ku diçe girantir dikin. Ji bo ku ev tecrîde bi dawî bibe gelek çalakî hatin li dar xistin. Van çalakiyan encam girt û bi Serokatî re hevdîtin hat kirin. Lê piştî wê hevdîtinê jî 6 meh cezayê disiplînê jê re hate birin. Ji bo ku ev tecrîde bi dawî bibe û azadiya fizîkî ya birêz Ocalan çêbibe heta ku ji me tê em ê çalakiya xwe bidomînin. Heta ku azadiya fîzîkî ya Rêber Apo pêk neyê em ê dev ji têkoşîna xwe bernedin. Banga min ji jinên Kurd ê ciwan heye ku ji vê tecrîdê re bêdeng nemînin. Heta ku Serok Apo bi fizîkî azad nebe em ê dev ji têkoşîna xwe bernedin. Ji bo şikandina vê tecrîdê çi bikeve li ser milê me ciwanan em ê bikin û em ê di vê hêlê de erka xwe pêk bînîn." 

 

MA / Zeynep Durgut