Piştî 4 sal û nîvan di 23’yê Cotmehê de di çarçoveya hevdîtina malbatê de bi Rêberê PKK’ê Abdullah Ocalan re ku 26 sal in di bin şert û mercên giran ên tecrîdê de li Girtîgeha Tîpa F a Ewlekariya Bilind a Îmraliyê tê girtin, hevdîtin hat kirin. Abdullah Ocalan di hevdîtina bi biraziyê xwe Omer Ocalan ê Parlamenterê Partiya Wekhevî û Demokrasiyê ya Gelan (DEM Partî) de, ev peyam da: “Eger şert û merc pêk bên, hêza min a teorîk û pratîk heye ku vê pêvajoyê ji zemîna pevçûnan û tundiyê ber bi zemîna hiqûqî û siyasî ve bibim.” Abdullah Ocalan ku di 28’ê Kanûnê de bi endamên Heyeta DEM Partiyê Pervîn Bûldan û Sirri Sureyya Onder re hevdîtin pêk anî, careke din hêza xwe ya çareseriyê bi biryardarî nîşan da û di vî warî de ê bangeke dîrokî li hemû derdoran kir.

 

 

Hevserokê Federasyona Komeleyên Hiqûqê û Piştevaniyê ya Malbatên Girtî û Hikumxwaran a Medê (MED TUHAD-FED) Kerem Canpolat, hevdîtina bi Rêberê PKK'ê Abdullah Ocalan re û peyamên wî nirxandin.

 

‘BI HÊVIYA BIBE ÇARESERÎ'

 

Canpolat çalakiyên di çarçoveya kampanyaya "Ji Abdullah Ocalan re azadî, ji pirsgirêka kurd re çareseriya demokratîk" bi bîr xistin û diyar kir ku hevdîtina bi Omer Ocalan re di encama têkoşîna wan a di vê çarçoveyê de pêk hatiye. Canpolat diyar kir ku wan gotiye hevdîtina bi Omer Ocalan re têrê nake û pêwîst e hem bi parêzeran hem jî ji aliyên siyasî û muxalîf ên Tirkiyeyê re hevdîtin bên kirin û wiha got: “Sedema me ev bû; ji bo bidawîbûna pêvajoya pevçûnan û ji bo buhranan gavavêtin bû. Em van geşedanan erênî dibînin. Em hêvî dikin ku ev berdewam bike."

 

BERDEWAMIYA HEVDÎTINAN

 

Canpolat bal kişand ser şer, krîz û trajediya mirovahiyê ya li Rojhilata Navînê û got ku yê di vî şerî û krîzê de winda dikin gel in. Canpolat anî ziman ku înkar û redkirina kurdan li Rojhilata Navînê israra di neçareserkirinê de ye û got ku soza Tirkiyeyê ya "aştiya Rojhilata Navîn" bêyî çareserkirina pirsgirêka kurd û qebûlnekirina ziman û çandê di li valahiyê maye. Canpolat bal kişand ser israra wan a ji bo rakirina tecrîdê û got ku ew li gel wê yekê ne ku şerê li Rojhilata Navînê sîrayetî Kurdistan û Tirkiyeyê neke û got ku ji bo vê jî divê bi Abdullah Ocalan re hevdîtin bên kirin. Canpolat diyar kir ku ji bo ku Tirkiye bandorê li şerê li Rojhilata Navînê neke divê di mijara hevdîtinan de gavan bavêje û got ku divê ev hevdîtin di navbera aliyan de bin.

 

BILA GAV BÊN AVÊTIN

 

Canpolat got: "Hemû sozên ji bo aştiyê bi qîmet in,  lê divê li hewayê nemînin. Pêwîst e qîmetê bidin gotinên birêz Abdullah Ocalan û kji bo li hewayê nemînin gav bên avêtin. Pêwîst e desthilat li hember vê bangê û destê tê dirêjkirin guhnedêriyê neke." 

 

BANGAWAZÎ

 

Canpolat bal kişand ser gotinên Abdullah Ocalan ên ji nû ve xurtkirina biratiya tirk-Kurdan û got ku ku înkarkirina kurdan nehiştiye biratiyeke rast pêk bê. Canpolat got: “Pêwîst e biratiya tirk-kurdan di çarçoveya destûra bingehîn de bikeve pratîkê. Heya ku ev yek pêk neyê wê kurd mehkûmî redkirinê bin. Ji bo vê jî divê garantiyek hebe. Hêvî û daxwazên kurdan jî hene. Divê zimanê kurdî û nasnameya kurdî bi destûra bingehîn bê garantîkirin. Ji bo vê jî banga birêz Abdullah Ocalan girîng e. Pêwîste ev bang li hewayê nemîne." 

 

Canpolat bibîr xist ku Abdullah Ocalan bang li hemû derdoran kiriye ku bi berpirsiyarî tevbigerin û got ku di vî warî de bar dikeve ser milê hemû gelan û rêxistinên sivîl û partiyên siyasî. 

 

MA / Rûkiye Adiguzel