Xwendekara Zanîngeha Yuzuncu Yilê (YYU) ya Wanê Rojîn Kabaîş (21) di 27’ê Îlona 2024’an de ji Wargeha Xwendekarên Keç a Seyyîd Fehîm Arvasî derket û piştre tu agahî jê nehatin girtin. Di 15’ê Cotmehê de jî cenazeyê wê 20 km’an dûrî wargehê li qeraxê golê ya Gundê Molla Kasimê hate dîtin. Ji bo lêpirsîna têkildarî mirina biguman a Rojîn Kabaîşê biryara nepeniyê hebû lê tevî vê jî medyaya alîgir ji bo avakirina binhişê “Rojînê întîhar kiriye”, hemû agahî parve kirin. 

 

Malbata Rojîn Kabaîşê jî ji roja ewil heta niha dibêje “keça me întîhar nekiriye lê hatiye kuştin.” Xwişka Rojîn Kabaîşê Elîf Kabaîş û meta wê Ozlem Kabaîş gotin ku lêpirsîneke bibandor nehatiye kirin. 

 

‘RÊVEBERIYA WARGEHÊ BERPIRSYAR E’

 

 

Ozlem Kabaîş bertek nîşanî îdiayên întîharê da û wiha got: “Biraziya min ne keseka wisa bû ku întîhar bike. Dema çûyî zanîngehê pir bikelecan bû. Berpirsyarê mirina wê, rêveberiya wargehê ye. Ji ber ku 17 saet piştî windabûnê agahî dan malbatê. Wê demê berpirsyar ew in. Hem li vê dinyayê hem jî dinyaya din dê destê me bi qirika wan ve be. Em ê dev ji doza Rojînê bernedin. Weke dayikekê ez bangî hevala Rojînê ya odeyê dikim; tu jî dê rojekê bibî dayik. Wê demê dê wijdana te biêşe. Du şarjên Rojînê hene yek nû ye yek jî kevin. Ya nû winda ye û yê kevin jî di nava tiştên wê de ye. Dema hevala Rojînê hatî xwarê amûra şarjê bi xwe re aniye yan na? Dema venegerî ma te qet negot ‘Rojîn li ku ye?’ An tu derewan dikî an jî xwe kerr û lal dikî. Hevala Rojînê û wargeh berpirsyar in. Dema winda bûyî ne wargehê ne jî hevala wê li me geriyan ne jî sersaxî xwestin.” 

 

BAL KIŞAND SER NAKOKIYAN

 

Ozlem Kabaîş, da zanîn ku xebatên lêgerînê li ser Gola Wanê hatibûn zêdekirin û wiha got: “Tu lêgerînên din nekirin û xwestin binhişê întîharê ava bikin. Heke li derveyî avê jî lêgerîn bikirana, dibe ku Rojîn bihata dîtin. Dibêjin întîhar kiriye lê di axaftinên wan de nakokî hene. Li rexekî dibêjin ’18 rojan di avê de ma ye’, li rexa din dibêjin ‘ewqas di avê de bimîne dê yekbûna laş xerab bibe lê xerab nebûye.’ A din jî, heke ewqas dem di avê de ma be, çawa DNA ya du zilaman derdikeve. Anku gotinên wan hev nagirin.” 

 

ÎDIAYA ‘HATE QETILKIRIN’

 

Ozlem Kabaîş, îdia kir ku biraziya wê piştî hatî qetilkirin avêtine avê û wiha pê de çû: “Em ne heqê xwe ne jî yê Rojînê li wan helal dikin. Banga me ji bo her kesî ew e ku bi şefafî û hesas nêzî vê meseleyê bibin. Her carê dosyayê parçe parçe radigihînin. Ji kerema xwe bila şefaf li ser bisekinin. Divê tavilê raporeke rast pêşkeş bikin. Êşa me hêj mîna roja ewil e. Ji ber ku kujerên wê hêj li derve ne. Dema em diçin ser gora wê, em Rojînê ne mirî weke birîndar dibînin. Bila kujerên wê bên dîtin ku di gora xwe de rihet razê. Êdî bes e bila tu Rojînên din neyên qetilkirin.” 

 

'BILA KUJER CEZAYÊ XWE BIKÊŞIN’

 

Xwişka Rojîn Kabaîşê Elîf Kabaîş jî bertek nîşanî îdiaya întîharê da û ev tişt anî ziman: “Xeyala wê zanîngeh bû û 3 salan xebitî. Ma ev hewldan tevek ji bo 2 rojên zanîngehê bû? Cihê lê winda bûyî wargeha dewletê ye. Ji bo navê wan dernekeve dixwazin dosyayê bigirin û dibêjin ‘întîhar kiriye.’ Xwişka min întîhar nekiriye. Em ê dev ji dosyayê bernedin û têbikoşin. Madem xwişka min di bin axê de ye, dê kujerên wê li derve wisa nekarin bigerin. Dê ev kujer cezayê xwe bikêşin.” 

 

'DÎMENÊN WARGEHÊ KÊM IN’

 

 

Elîf Kabaîş, bal kişand ser diyaloga di navbera wê û hevala Rojînê ya odeyê ya piştî windabûna xwişka wê û ev wiha got: “Dema min pirsa ‘gelo ji Rojînê tu agahî hene?’ dikir, digot ku haya wê jê nîne û di wê navberê de radiza. Lê belê bi qasî 15 deqeyan li ser telefonê bi Rojînê re axiviye. Dema min pirsa ‘başe lê çima agahî jê nedihatin girtin te xeber neda me?’ jê kirî jî got; ‘Ma keseka ez du roj in nas dikim çima pê re samîmî bim?’ Bi hevala xwe ya odeyê ya ku ji bo wê dibêje ‘ez pê re samîmî nînim’ re 15 deqeyan li ser telefonê diaxive. Ne agahiyê dide wargehê ne jî me. Anku îfadeyên wê jî yên binakok hene. Dîmenên derketina Rojînê yên ji wargehê hene lê ya wê nînin. Piştre jî dîmenên kêliya telefona Rojînê tê dîtin hene lê beşa kê ew dîmen daniye wir tune ye. Anku dîmen tevek jî kêm in. Her tişt binakok e, wargehê dereng agahî da me. Ez li vir bangî rayedaran dikim; her kê xwişka min qetil kiribe, dixwazim bê dîtin. Qet nebe hindik jî be bila dilê me rehet bibe.” 

 

MA / Heval Onkol - Şîrvan Şîlan Çîl