Parlamenterên DEM Partiyê Pervîn Buldan û Sirri Sureyya Onder di 28’ê Kanûnê de li Girtîgeha Tîpa F a bi Ewlekariya Bilind a Îmraliyê bi Rêberê PKK’ê Abdullah Ocalan re hevdîtin kirin. Nirxandinên Abdullah Ocalan ên di hevdîtinê de weke 7 xalan bi raya giştî re hatin parvekirin. Di peyamê de Abdullah Ocalan got ku divê biratiya Kurd-Tirkan were xurtkirin û banga “nekevin nava hesabên teng û demkî” li partiyên siyasî kir. Her wiha got: “Ji bo Tirkiye û herêmê dem dema aştî, demokrasî û biratiyê ye.” 

 

Serokê Komeleya Aştiya Civakî û Diyalogê (TOD-DER) Mûrat Kan têkildarî nîqaşên ser çareseriya pirsgirêka Kurd û peyamên ji Îmraliyê hatin axivî. 

 

'PROJEYA NETEWEYA DEMOKRATÎK ALTERNATÎF E’ 

 

Kan, diyar kir ku navenda “Şerê Sêyemîn ê Cîhanê” ku ji hêla hêzên kûrewî ve tê meşandin Rojhilata Navîn e û vê rewşê li Sûriyeyê rê li ber geşedanên cidî vekiriye. Kan, anî ziman ku hêzên hegemon ji bo berjewendiyên xwe li Sûriyeyê gel bi hev dane qirkirin û projeya Neteweya Demokratîk a Abdullah Ocalan ji bo vê rewşê alternatîf e. 

 

Kan,  wiha domand: “Divê hemû gel û baweriyên cuda li ser bingeheke wekhev û azad beşdarî rêveberiyeke demokratîk bibin. Dema em wiha difikirin, çareserî jî eşkere dibe. Dema Kurd bêstatû hatin hiştin, ev yek dê rê li ber şer û qirkirineke mezin a civakî veke. Lewma ev bangawazî jehrkuja vê rastiyê ye. Hêzên kûrewî di sedsala 20’emîn de bi Peymana Sykes-Picotê û Konferansa Qahîreyê re Kurd bêstatû hiştin. Ev jî bû pirsgirêka sereke ya netewedewletên li herêmê. Di roja me li şûna çareserkirina pirsgirêka Kurd-Tirkan, vê bêstatûyê rê li ber şer vekir. Lewma divê mirov banga Abdullah Ocalan di vê çarçoveyê de binirxîne. Divê ev qert ji destê hêzên kûrewî were derxistin û ji bo çareseriyê gav bê avêtin.” 

 

'DIVÊ GUH BIDIN BANGAWAZIYA OCALAN’

 

Kan, got ku ji bo gelan girîng e ku bangên Abdullah Ocalan veguherin aştiyê û ev tişt anî ziman: “Îktîdarê, pêvajoya 2013-2015'an bi kar anî. Divê guh bidin banga dawî ya ji Îmraliyê. Di serî de AKP-MHP divê hemû partiyên muxalefetê wate bidin banga birêz Abdullah Ocalan û helwestekî li gorî vê nîşan bidin. Heke wiha bikin dê pergala li ser înkarkirina Kurdan hatiye avakirin biguhere. Ev guherîn jî dê bi xwe re demokrasiyê bîne. Lewma girîng e. Ev yek dê veguhere demokrasî û aştiya civakî. Divê hêzên bi sala ye bi saya xwîn, hêsir û şer xwe li ser pêyan digirin bên ekartekirin. Ji bo ev pêvajo veguhere aştiyê divê her kes berpirsyartiyê li xwe bigire. Wê demê dê aştiya civakî çêbibe. Vî şerî bi sala ye gelek îktîdar tune kir. Divê ev rastî neyê paşguhkirin.” 

 

'EM AMADE NE TIŞTA DIKEVE SER MILÊ XWE PÊK BÎNIN’ 

 

Kan, destnîşan kir ku ji Tirkiyeyê re tê gotin ku “An dê vê pirsgirêkê çareser bikî an jî dê bi vê pirsgirêkê re hilweşî” û axaftina xwe wiha qedand: “Divê çîna serdest a Tirk û avadaniyên siyasî yên Tirkiyeyê vê rastiyê paşguh nekin. Divê îktîdar û muxalefet bibîne ku bi paşguhkirina xwebirêvebirina gel re pirsgirêk çareser nabin. Lewma divê helwestekî rast nîşan bidin. Şer, rê li ber xizaniyê vedike. Rê li ber ranta şer, nelirêtiyê û tunebûna nirxên civakê vedike. Ji bo gelên Tirkiyeyê careke din nirxên xwe biafirînin, divê guh bidin vê bangê û erênî nêz bibin. Aştiya civakî jî bi vê pêkan e. Heke li ser van daxwazan hevkariyek çêbibe, dê pirsgirêkên civakî yên Tirkiyeyê jî çareser bibin. Em amade ne ku tişta dikeve ser milê me bikin. Bila her kes jî pêk bîne.” 

 

MA / Mujdat Can