Komeleya Lêkolîna Ziman û Çandê ya Avestayê ji sala 2018’an heta niha li Îzmîrê qursên zimanê Kurdî dide. Qurs, di du rojên hefteyê de tê dayin. Ji miletên Tirk, Ereb, Fars, Qirgiz û Qazax jî gelek kes tev li qursan dibin. Yek ji kesên hatiye qursê jî Îndîra Saîpnazarova ya Qazaxistanî ye. Îndîra Saîpnazarova, ji bo ku bi zimanê kesên li derdora xwe û cîranên xwe bizane, biryar da ku tev li qursan bibe. Îndîra Saîpnazarova, li Qazaxistanê hînî gotinên “Ez ji te hez dikim” û “Çawayî, baş î?” dibe û xwestiye ku peyvên nû li ferhenga xwe ya zimanê Kurdî zêde bike. 

 

‘MIN GELEK KURDÎ MEREQ DIKIR’

 

Îndîra Saîpnazarova, da zanîn ku li Qazaxistanê li taxa lê dijiya Kurd jî hebûn, wê Kurdî mereq kiriye û di demên ewil de ji wê re gelek zehmet hatiye. Îndîra Saîpnazarova, wiha dirêjî da axaftina xwe: “Min dibistana amadehî li Qazaxistanê xelas kir û hatim Tirkiyeyê. Li Zanîngeha 9 Eylûlê beşa psîkolojiyê dixwînim. Li vir min hevjînê xwe nas kir. Hevjînê min Kurd e, malbat û hevalên wî dema kom dibin bi Kurdî diaxivin. Min tu tiştek ji wan fêm nedikir. Her tim min jê pirsa ‘Ev tê çi wateyê? Ji bo min wergerînin.’ Lewma min ji xwe re got ‘ev wiha nabe, divê ez hînî Kurdî bibim.’ Anku mereqa min demek piştre bû neçariyek. Her wiha hevjînê min her tim stranên Kurdî vedike û derheqê gelê Kurd de agahî dida. Digot ku Kurdî zimanekî qedîm e.”

 

‘DI POLÊ DE YEK JI KESÊN HERÎ SERKEFTÎ ME’

 

Îndîra Saîpnazarova, diyar kir ku dema zanî li Avestayê qursa Kurdî tê dayin wê yekser serlêdan kiriye û ev tişt anî ziman: “Di demên ewil de ez li ser înternetê dixebitîm. Ji stranên hevjînê min vedikir de min çendek peyv zanîbûn. Dema ewil hatim qursê di dersan de min gelek zehmetî nedikişand. Heta ji kesên herî baş ên polê me. Pêşketina min baş e. Mamosteyê me pir baş e. Dema hînî Kurdî dibim zehmetiyê nakêşim. Qeydên Kurdî dişibin yên Rûsî û Qazaxî lewma zehmetiyan nakêşim. Lê ji ber ku di Kurdî de lêkerên bêpergal hene, ez hinek dixitimim.” 

 

‘ZIMANEKÎ PIR DEWLEMEND E’

 

Bi domdarî Îndîra Saîpnazarova got ku li malê bi hevjînê xwe re li derve jî bi hevalên xwe re pratîkê dike û wiha got: “Kesên li derdora min ji ber ku diçim qursa zimanê Kurdî keyfxweş dibin. Dibêjin ‘xwezî her kes mîna te bûya.’ Malbata min di parvekirinên min ên li ser medyaya civakî de dibîne ku hînî Kurdî bûme û piştgiriyê dide. Dema hevalên min ên Qazaxistanê tên vê derê, ez wan j bo Kurdî teşwîq dikim. Ji ber ku ji vî zimanî hez dikim. Zimanekî gelek dewlemend e. Dixwazim di demên pêş de Kurdiya min a akademîk û wêjeyî  hebe.” 

 

MAMOSTEYÊ KOMELEYÊ JI BO QURSAN BANG KIR 

 

Ji mamosteyên Avestayê Alî Sayan jî da zanîn ku ji her temenî û gelan eleqeyeke baş ji bo Kurdî heye û wiha got: “Biqasî Kurdan, ji gelên Tirk, Ereb, Faris, Qirgiz, Qazax û ji welatên Ewropayê jî gelek kes tên qursa ziman. Kesên qet bi zimanê Kurdî nizanin, em wan heta asta mamostetiyê perwerde dikin. Em ji ewil asta wan diyar dikin û wisa dest bi xebatê dikin. Kesên ku di mijara Kurdî de tu tiştekî nizanin, di dema hînbûnê de pirsên kûrtir dipirsin. Min dîtiye ku têkildarî koka peyvên ku qet nehatiye bîra me pirs kirine. Ev pirs ji hêla erênî ve me didin zorê. Dikin ku em bêhtir amadekariyan bikin. Avesta, li gel qursên ziman, her wiha dîrok û çanda Kurdî jî vedibêje. Banga min ji bo her kesên dixwazin hînî Kurdî bibin ew e ku bên vê derê. Divê her kes xwedî li Kurdî derkeve.”