MELETÎ - Sebahat Tûncel di pîrozbahiya Newrozê ya li Meletiyê de axivî û got, "Hêvî heye, vê carê em dikarin aştiyê pêk bînin. Em bi we bawer in."

 

Pîrozbahiya Newrozê li Xaçerêya Emeksiz a Meletiyê pêk hat. Şahiya ku bi siloganên; ‘Rêbertiya Azad Civaka Demokratîk’ û ‘Azadî ji bo civaka demokratîk’ hate lidarxistin, bi hezaran kes tevlî bûn. Di pîrozbahiyê de gelek caran dirûşmên mîna; ‘Li dijî faşîzmê mil bi mil’ û ‘Jin, jiyan, azadî’ hatin berzkirin.

 

Endamê Komîteya Rêveberiya Navendî ya Partiya Kedê Umut Yemîn diyar kir ku pêwîstiya herêmê bi aştiyê heye û wiha got: "Lê belê hikûmet bi salan e aştiyê qebûl nake, êrîşên xwe didomîne. Em ji vê derê ji hikûmetê û hevkarê wê dipirsin, hûn li benda çi ne ku dawî li girtiyên siyasî û polîtîkayên qeyûm bînin? Qeyûman têrê nekirin, niha jî êrîşî Lihevkirina Bajar kirine.”

 

Berdevka Partiya Çep a Keskan Ahmet Asena anî ziman ku ew di destpêka serdemeke nû de ne û wiha got: "Ev heyam wê li ser tiştekî ku berê çêbûye neyê avakirin, ev serdem di heman demê de serdemeke têkoşînê ye, serdema ji nû ve rêxistinbûnê ye. Eger em li kursiyên xwe rûnên, çi bi serê Îmamoglû hat wê bê serê me. Divê em bi vê hişmendiyê nêzîk bibin. Em ji vir bang li bloka desthilatdar dikin. Bi zimanê şer aştî pêk nayê. Şert û mercên xebatê yên Ocalan bila bên başkirin. Eger hûn vê nekin, hûn ê cihê xwe di rûpela reş a dîrokê de bigirin."

 

'BÊHIQÛQIYA LI ROJAVA JÎ BELAV BÛYE'

 

Endama Tevgera Jinên Azad (TJA) Sebahat Tûncel di axaftina xwe de kesên ku di Newrozan de bedena xwe dane ber agir bi bîr anî û wiha got: ''Îtîraz têrê nake, divê em îtîraza xwe birêxistin bikin. Tenê gotina na têrê nake, em ê bi hev re ava bikin bê ka divê çawa be. Tirkiye ji sala 2015'an û vir ve bêhiqûqî û bêedaletiyeke giran re rûbirû ye. Sedema ku krîza siyasî û aborî ewqasî kûr bûye, astengiya ku hikûmetê di nava gel de daniye, polîtîkaya cihêkar a li hemberî Kurdan e. Polîtîkaya ku li hundir û derve li dijî Kurdan dimeşîne. Wê demê me gelek îtiraz kir, me got, 'eger hûn ji bêhiqûqiyê re bêjin 'erê' wê sibe bê serê we. Îro Ekrem Îmamoglû girtin, ne tenê Ekrem Îmamoglû, lê kî bertek nîşanê hikûmetê dide, bi binçavkirin û girtinê re rûbirû ye. Li Tirkiyeyê tayînkirina qeyûmên bûye tiştik asayî. Di sala 2015-2016 'an de bi biryarnameyên KHK’ê Tirkiyeyê rêve birin, qanûn danîn aliyekê, li şûna şaredarên ku Kurdan hilbijartina qeyûm tayin kirin. Li dijî HDP’ê operasyon pêk anîn, hevserok, parlamenter hatin girtin, her wiha saziyên me hatin girtin. Akademîsyenên aştîxwaz hatin girtin. Bêhihûqî bi sala 2015’an sînordar nema, îro li rojavayê Tirkiyeyê jî berbelav bûye.”

 

Sebahat Tûncel got ku ger wê demê bertek bihata nişandan îro ev tişt nedihatin jiyîn û balkişand ser têkoşîna hevpar a li hemberî bêedaletiyê.

 

'PIRSGIRÊKA AŞTIYÊ BI DEWLETÊ RE TÊKILDAR E'

 

Sebahat Tûncel banga Rêberê Gelê Kurd Abdullah Ocalan bibîr xist û anî ziman ku piştî vê bangê PKK'ê biryar da ji bo ji nû ve avakirinê kongreyê lidar bixe, lê belê biryar hat dayîn ku kongre bi pêşengiya Abdullah Ocalan pêk were. Sebahat Tûncel da xuyakirin ku dewletê şert û mercên vê firsendê neafirandiye û wiha got: "Niha ev yek wê çawa bibe? Ev serdemeke nû ye. Ji ber vê yekê pirsgirêka aştiyê bi dewletê re têkildar e. Dewlet wê rê li ber aştiyê veke. Siyaseta demokratîk li ser me û we ye. Pêwîstiya me hemûyan bi aştiyê heye. Tenê li qadê pirsîn, 'Gelo di vê dewletê de bawerî dikare hebe?', dibe ku baweriya bi dewletê hebe yan na. Sedem? Mixabin pêkanînên dewletê di bîra Kurdan û jinan de neyînî cih bûne. Lê belê dewlet neçar e vê bibîne û vê bêbaweriya gel ji holê rake. Baş e, em dê baweriya xwe bi kê bînin? Bi rastî jî hêvî heye? Erê hêvî heye. Vê carê em dikarin li hev bikin. Em ji kê bawer in, em ji xwe bawer in. Em bi we bawer in."

 

Piştî axaftinan agirê Newrozê hat pêxistin û govend hat gerandin.