ÎZMÎR - Rêxistinên hiqûq û mafên mirovan xwestin binpêkirinên li Girtîgeha Jinan a Şakranê bên bidawîkirin û banga berpirsyartiyê li saziyên peywirdar kirin.
Şaxên Komeleya Hiqûqnasên ji bo Azadiyê (OHD), Komeleya Mafên Mirovan (ÎHD) û Komeleya Hiqûqnasên Hemdem (ÇHD) ên Îzmîrê, Weqfa Mafên Mirovan a Tirkiyeyê (THÎV) û Komeleya Piştgirî û Piştevaniya bi Malbatên Girtî û Hikûmxwaran re ya Egeyê (EGETUHAYDER), têkildarî binpêkirinên mafên mirovan ên li Girtîgeha Jinan a Şakranê, li pêşiya girtîgehê daxuyanî dan. Şandeyeke ji nûnerên ÎHD û OHD’ê pêk dihat, beriya daxuyaniyê çûn serdana girtiyên cezayê disiplînê lê hatibû birîn. Di daxuyaniyê de pankarta “Dawî li binpêkirinên mafan û sepanên keyfî yên li girtîgehan bînin” hate hilgirtin û dirûşmên “Bijî berxwedana zindanan", "Jin, jiyan, azadî", "Girtiyên siyasî bi tenê nînin” û “Rûmeta mirovahiyê dê îşkenceyê têk bibin” hatin berzkirin. Rêveberên DEM Partiyê, TJA û HDK’ê jî tev li daxuyaniyê bûn. Hevseroka EGETUHAYDER’ê Ayfer Yildirim daxuyanî xwend û got ku binpêkirinên mafan êdî zêde û sîstetamîk bûne û binpêkirinên li Girtîgeha Şakranê zêde bûne.
HETA MAFÊN SEREKE JÎ TÊN ASTENGKIRIN
Bi domdarî Ayfer Yildirim anî ziman ku di serlêdanên dawî yên malbatên girtiyan de herî zêde binpêkirin li Girtîgeha Jinan a Şakranê xuya dikin û wiha pê de çû: “Hate tespîtkirin ku mafên herî sereke yên girtiyan jî tên astengkirin. Di serdanên malbatan de nahêlin girtiyên jin xizmên xwe hembêz bikin û der heqê girtiyên xizmên xwe hembêz dikin de jî cezayê disiplînê hatiye birîn û ev rewş di hemû hevdîtinan de dubare dibe. Di heman demê de, der heqê girtiyên di dema hevdîtinê de tililiyan diavêjin de jî cezayê disiplînê tê dayin û tililî weke dirûşm hatiye nirxandin. Li hêla din sewqên girtiyan ên ji bo nexweşxaneyan nayên kirin, tedawiyên wan tên astengkirin an jî nayên kirin, di dema sewqkirina nexweşxaneyê de cotkelemçe li girtiyan tê ferzkirin, li nexweşxaneyê destkelemçekirî tên sekinandin, li xwe kirina xişran, şort, etekên heta çokê û cilûbergên bi kapşon hatine qedexekirin, tu berhemên rêsandî û hatine dirûn nayên dayin, tê ferzkirin ku dema por tê birîn divê patik xuya nake, di dema lêgerîna qawîşan de her tişt tên belavkirin, gelek nîşe, lênûs û alavên din jî bi awayekî keyfî tên desteserkirin.”
Di berdewamê de Ayfer Yildirim binpêkirinên li girtîgehan rêz kir û axaftina xwe wiha qedand: “Hewl didin zexta li girtîgehan rewa nîşan bidin û zexta psîkolojîk li girtiyan dikin. Vekirina pêşiya rêyên çareseriya aştiyane ya Tirkiyeyê, ji bo pêkvejiyaneke li ser zemîna hemwelatiya wekhev û avakirina serweriya hiqûqê, di serî de girtîgeh divê ji bo tevahiya saziyên dewletê pêvajoyeke reformê bê destpêkirin. Divê sepanên cihêkarî û keyfî yên li girtîgehan tavilê bên bidawîkirin. Di çarçoveya van nirxandinan de; ji bo binpêkirinên mafan ên li girtîgehan bên bidawîkirin, ji bo miameleyeke li gorî rûmeta mirovahiyê û ji bo bidawîkirina binpêkirinên mafan û sepanên keyfî, em bang li Wezareta Dadê, Wezareta Karên Hundir, Saziya Venêrîna Cemaweriyê û hemû sazî û dezgehên têkildar dikin ku berpirsyartiya xwe bicih bînin. Xebatên me yên têkildarî girtîgehan heta ku ev binpêkirin bi dawî dibin dê bidomin.”