NAVENDA NÛÇEYAN - Li bajarê Fabriano yê Îtalyayê hemwelatiya fexrî dan Pexşan Ezîzî, Şerîfe Muhammedî û Werîşe Muradî yên ku ji aliyê dewleta Îranê ve cezayê îdamê li wan hatiye birîn.
Li bajarê Fabriano yê Îtalyayê hemwelatiya fexrî dan sê jinên aktîvîst Pexşan Ezîzî, Şerîfe Muhammedî û Werîşe Muradî yên ku ji aliyê dewleta Îranê ve cezayê îdamê li wan hatiye birîn. Endama Meclisa Şaredariya Fabriano Marta Ricciuti daxuyanî da û ragihand ku bajar ev biryar ji bo rûmetkirina têkoşîna jinan a ji bo mafên sivîl û edaleta civakî daye. Biryar bi pêşniyaza Komîsyona Wekheviya Jin-Mêr bi dengdanê hat qebûlkirin.
Marta Ricciuti li ser hesabê xwe yê medyaya dîjîtal daxuyanî da û got: “Hemwelatiya fahrî ya ji bo Pexşan Ezîzî, Şerîfe Muhammedî û Werîşe Muradî li meclisa me bi dengdanê hate qebûlkirin. Ev jin ji ber ku ji bo parastina mafên jin û karkeran kar û xebatên aştiyane meşandine, mehkûmî îdamê hatin kirin.”
Marta Ricciuti got ku biryara hemwelatiya fahrî tenê jestek sembolîk nîne, di heman demê de amûra dengê têkoşerên azadî û rûmeta mirovahiyê ye.
Marta Ricciuti diyar kir ku ev gav ji bo rawestandina îdaman armanc dike ku zexta navneteweyî zêde bike û rayedarên Îranê ji vê biryarê paşde vekişîne û got: “Azadiya fikir û îfadeyê tenê mafek nîne, di heman demê de amûreke xurt a berxwedan û piştevaniyê ye. Bêdengî jî cureyekî hevkariya sûc e.”