RIHA - Endama Meclisa Jinan a Reqayê Xewla Îbrahîm Îsa diyar kir ku armanca dewleta tirk û koma wê ya paramîlîter SMO’yê ew e ku projeya neteweya demokratîk têk bibin û got ku ew ê ji bo parastina pergala xwe têbikoşin.
Êrişên dewleta tirk û koma wê ya paramîlîter ên li dijî Bakur û Rojhilatê Sûriyeyê didomin. Di 10’ê Kanûnê de li Minbicê 3 endamên Civaka Jinan a Zenûbiyayê hatin qetilkirin. Bi sedhezaran welatiyên ji ber êrişên dewleta tirk ji Efrînê koçî Til Rifet û Şehbayê bûbûn jî dîsa koçber bûn.
Yek ji cihên avadaniya neteweya demokratîk û destekftiyên jinan lê tên hedefgirtin jî Reqa ye. Reqa, yek ji mezintirîn bajarên Sûriyeyê û di sala 2014’an de ji hêla DAIŞ’ê ve hate dagirkirin û weke “paytext” hate ragihandin. Bajarê ku rojên reştarî jiya, 3 sal piştre di 19’ê Cotmeha 2017’an de ji hêla YPG û YPJ ên girêdayî HSD’ê ve hate rizgarkirin. Bajar, ev 7 sal in bi paradîgmaya “Azadîxwaziya jinê, demokratîk û ekolojîk” tê birêvebirin. Bajar, li dijî êrişên dijwar ên herêmê jî seferber bûye.
Endama Meclisa Jinan a Reqayê Xewla Îbrahîm Îsa ku şahidiya beriya serdema DAIŞ’ê û serdema piştî DAIŞ’ê kiriye, got ku di nava 7 salan de wan di bin sîwana Rêveberiya Xweser de xwe birêve birine.
GUHERÎNA BI RÊVEBERIYA XWESER RE
Xewla Îbrahîm Îsa, anî ziman ku jiyana jinan a beriya DAIŞ’ê gelek zehmet bû û wiha got: “Jin, di nava malê de hefsî bûn. Di bin siya zilaman de dijiyan. Lê bi dagirkirina bajar a ji hêla DAIŞ’ê ve ev rewş hêj girantir bû. Ji ber ku DAIŞ’ê yekser jin hedef digirt. Piştî dagirkirinê, perwerdeyên jinan nîvco man. Piştre jî mafên wan ên heyî ji dest hatin girtin.”
Bi domdarî Xewla Îbrahîm Îsa destnîşan kir ku di pêngava rizgarkirina bajar de jinan roleke girîng lîstine û wiha axivî: “Rêveberiya Xweser di hemû qedemeyên rêveberiyê de cih da jinan. Bi taybet jî di saziyên îdarî de cih da û saziyên xweser vekir. Bi vê yekê re jinan di azadkirina civakê de rol lîstin. Qedrê jinan zêdetir bû û bi rastî jî bûn rûyê jiyana nû. Di çalakî, konferans û kongreyan de cih girtin.”
HEDEF PROJEYA NETEWEYA DEMOKRATÎK E
Xewla Îbrahîm Îsa, bi lêv kir klu bi projeya neteweya demokratîk re gelek netew, bawerî û olên cuda bi hev re jiyane û axaftina xwe wiha qedand: “Armanca Tirkiyeyê ya ji êrişan, hedefgirtina projeya neteweya demokratîk e. Naxwazin em di nava aramiyê de bijîn. Dê têkoşîna me ya li dijî êrişan bidome.”
MA / Ceylan Şahînlî