Serokê Şaxa Odeya Endezyarên Çandiniyê ya Dîlokê Abdulkadîr Denîz, bilêv kir ku cotkar dizanin şewitandina pirêzeyê zirar e, lê belê ji ber rewşa aborî dişewitînin. Denîz, diyar kir ku eger dewlet bi hîbeyê makîneya perçekirina priêzeyê bide cotkaran û mazotê bi erzanî bide wê rê li ber şewitandina pirêzeyan bê girtin.
Li Kazanliyê, serevanên ku zebze diçandin, niha ji ber maliyeta wan kêm e erê xwe dan xox, nektarî û mûzan. Cotkaran, got: "Qet nebe em ê hew deyndar bibin. Qezenca mûz hindik e, lê bêmesref e."
Serokê Hilberînerên Serayê yên Behra Spî Tansel Îzgî, bal kişand ser rewşa cotkarên serevaniyê dikin û destnîşan kir ku ji ber maliyetên zêde cotkar dixisirin.
Tekane kolînerê Rihayê Mûrat Yontem, bal kişand ser krîza aborî û got: "Eger wisa dewam bike ez ê ji mecbûrî dev ji vî karî berdim."
Esnafên Sîteya Traktorvanên Rihayê, diyar kirin ku ew makîneyên çandiniyê dikirin lê nikarin bifiroşin û got: "Berê li bazarê rêjeya traktorên sifir ji sedî 80 bû. Lê li herêmê niha ev hejmar ji sedî 10 e. Esnafên ku berê traktor dikirîn, niha traktorên xwe difiroşin.
Li Wanê nalbûr jî ketin bin bandora krîza aborî. Esnafên bi dolaran alavan dikirin, diyar kirin ku heta li welat nêvengeke ewle çênebe wê rewşa aboriyê baş nebe.
Hevserokê Giştî yê HDP’ê Sezaî Temellî yê li Gungorenê bi karkerên tekstîlê re civiya wiha got: “Em ê di sindoqan de bersiva herî baş bidin feraseta tekparêz a desthilatdariyê, dijminên kedê û feraseta ku şer li ser gelan ferz dike.”
TUÎK’ê rêjeya bêkariya di meha Adarê de aşkere kir. Rêjeya xebitandinê kêm bûye û di meha Adarê de jî ji sedî 14.1 bêkarî zêde bûye.
Li gundên Çinarê çinîna pîvazan dest pê kir. Cotkar diyar dikin ku ji ber şiliya îsal tesîrê li ser zeviyên wan kiriye xêr û bêr wek salên berê nebaşe û kar û zirara wan hev dernaxe. Karkerên ku çinîna pîvazan dikin jî gotin ji ber germê karê wan gellek zor e û bi qasî keda xwe yewmiya xwe nastînin.
KKP'ê, panela “Em li nane xwe xwedî derkevin” li Eywana Şanoyê ya Navenda Çand û Kongreyê ya Şaredariya Bajarê Mezin a Amedê li dar xist.
Li Mêrdînê, îsal ji ber debra zad kêm bû, cotkar ji bo çandina berê dudoyan dudilî ne. Cotkar, dixwazin maliyet kêm bibe.
Aborîzan Erkîn Başer krîza aborî nirxand û got, ji ber nebaweriya di qada siyasetê de derzên mezin li aboriyê dikevin.
Saziya pîlekirina Krediyan Moody's, puanên krediya Tirkiye ji BA3 puanan daxist B1 puanê. Moody's, rewşa Tirkiye di aliyê neyînî de nirxand.
Kenan Gungordu ku piştî ji şaredariyê hatibû avêtin, li ber şaredariyê bi dirûşmeya "ez karê xwe dixwazim" dest bi çalakiyê kiribû. di roja 62'yan a çalakiyê de hatibû binçavkirin û 6 meh û 7 rojan girtî mabû. Gungordu, got: "Di 12'ê Hezîranê de ji ber çalakiya ku min li ber şaredariyê li dar xist, ceza li min hatibû birîn. Dadgehê ev ceza û dosyeya bavê min kir hincet û got 'Şaredariya Zeytînbûrnûyê mafdar e' û doza min betal kir."
Li Pasaja Japonê ya Rihayê ku pêlîstok, amûrên malê û amûrên xişirî ji her deverên Tirkiyeyê re dişîne, rewşa kar ji 5 paran daket parekê. Esnafê pasajê Ethem Baygeldî, got: "Berê me bi pereyê di dest xwe de dikaribû 5 konteynr mal bikire, lê niha em pê dikarin konteynirekê bikirin."